मेहंदीच्या हातावर
उमटली दाट नक्षी
माहेरच्या आठवांचा
उभा अंगणात पक्षी..

उभा अंगणात पक्षी
त्याला मोकळे आभाळ
परतून माहेराला
जाते मन किती काळ..

जाते मन किती काळ
सोयरीक साधण्यास
झोका जाई वरखाली
कसे सावरु मनास?

कसे सावरू मनास
दाटे मनी हूरहूर
पाखरांनो सांगा आता
लेक भेटाया आतूर

सौ.प्रतिभा महादेव चौगले

ब्लॉकचे पैसे भर ग मुली
भर ग मुली
मग जा आपल्या सासरला
सासरला
ब्लॉकचे पैसे भरले ग आई
भरले गं आई
आता तरी जाऊ का सासरला
सासरला
ब्लॉक ताब्यात घे ग मुली
घे ग मुली
मग जा आपल्या सासरला
सासरला
ब्लॉक ताब्यात आला ग आई
आला ग आई
आता तरी जाऊ का सासरला
सासरला
ब्लॉकची सजावट कर ग मुली
कर ग मुली
मग जा आपल्या सासरला
सासरला
ब्लॉकची सजावट झाली ग आई
झाली ग आई
आता तरी जाऊ का सासरला
सासरला
टेलिफोनचा नंबर लाव ग मुली
लाव ग मुली
मग जा आपल्या सासरला
सासरला
टेलिफोन आता आला ग आई
आला ग आई
आता तरी जाऊ का सासरला
सासरला
नवी गाडी घे ग मुली
घे ग मुली
मग जा आपल्या सासरला
सासरला
नवी गाडी घेतली ग आई
घेतली ग आई
आता तरी जाऊ का सासरला
सासरला
व्यवहार नाही ठाऊक तुला
ठाऊक तुला
मीही येते, रहायला.

कविता तीही लिहित असते
कविता मीही लिहित असतो
ती चंद्र- चांदण्यांची बात करते
मी स्वतः ला शोधत असतो

ती जर चंद्र - चांदण्यांतून हटली
मी जर स्वत:मधून निघालो
तर तिला मी दिसेल आणि मला ती

त्यानंतर दोघांच्याही भावना
उलगडत जातील एकमेकांना
जे कधीच आजपर्यंत दोघांकडूनही
बोललं गेलं नाही

जे तिच्याही मौनप्रेमातून हरवलं
जे माझ्याही निशब्दतेतून निसटलं
मग तिचंही प्रेम लख्ख उजळेल
माझाही प्रेमदीप प्रकाश देईल

नंतर काय सांगू मी आता
ती माझी होईल
अन् मी तिचा होईल

- ऋषिकेश तेलंगे
https://www.facebook.com/rushikesh.telange.9

चैत्र नेसतो सतरा साड्या
वैशाख ओढतो व-हाडाच्या गाड्या
ज्येष्ठ बसतो पेरित शेती
आषाढ धरतो छत्री वरती
श्रावण लोळे गवतावरती
भाद्रपद गातो गणेश महती
आश्विन कापतो आडवे भात
कार्तिक बसतो दिवाळी खात
मार्गशीर्ष घालतो शेकोटीत लाकडे
पौषाच्या अंगात उबदार कपडे
माघ करतो झाडी गोळा
फाल्गुन फिरतो जत्रा सोळा
वर्षाचे महिने असतात बारा
प्रत्येकाची न्यारीच त-हा।।

“सुमनांजली” या काव्यसंग्रहातून…

प्रयत्न करितां जीव तोडून, जेव्हां यश तुम्हा न येई
सोडून देता त्याला तुम्हीं, नशिबास दोष देत राही..१

दोष नका देवू नशिबाला, मार्ग निवडले तुम्ही चुकीचे
का न मिळाले यश तुम्हां, मूल्यमापन करा प्रयत्नाचे...२

चूक दिशेने प्रयत्न होतां, वाहून जातो सदा आपण
यश जेव्हा मिळत नसते, निराश होवून जाते मन...३

पुनः पुन्हा प्रयत्न करूनी, यश न आले तुमचे हातीं
प्रयत्नाची दिशा बदलतां, जुळून सहजच सारे येती...४

डॉ. भगवान नागापूरकर
संपर्क - ९००४०७९८५०
bknagapurkar@gmail.com

अनभिज्ञ बिकट वाटा
अगतिक जिद्दी पाऊले

ध्येय खंबीर वाटसरूंचे
अथक नित्यची चालले

वळणेही, वेडी वाकडी
अंदाज, सारेच आंधळे

साथ अनामिक वाटाडा
हातात हात धरुनी चाले

साक्षी,स्पर्श त्याचे ग्वाही
निःशंक! जगती चालले

चराचरी न कुणीही एकटे
रूप श्रीचे सोबती चालले

हेच अतर्क्य, अगम्य सारे
सुखनैव! चिरंजीव राहिले

-- वि.ग.सातपुते.(भावकवी)

9766544908

रचना क्र. ३६.

५ - २ - २०२२.

यंत्रवत! झाला मानव

धन्य ती महाराष्ट्र माऊली

अनेक थोरा जन्म देऊनी पावन तू झाली //धृ//

ज्ञानाचा तो मुकूटमणी, ग्रंथ रचिला ज्ञानेश्वरी

ओवीबद्ध साज प्राकृतीं चढविला, भगवतगीतेवरी

तेज चमकूनी सुर्यासम, दाही दिशा उजळली //१//

अनेक थोरा जन्म देऊनी पावन तू झाली

तुकाराम तो संत महान, अभंगाचा राजा

हासंत खेळत शिकवली, जीवनातील मजा

अभंगाची मधूर सुमने, सर्वत्र तुक्याने ऊधळली //२//

अनेक थोरा जन्म देऊनी पावन तू झाली

संवाद करुन विठोबाशी, नामदेव नाचला

तल्लीन होऊनी भजनासी, मधूर गाऊ लागला

भक्ति अर्पून प्रभूला, भावी निरंजने ओवाळली //३//

अनेक थोरा जन्म देऊनी पावन तू झाली

तसेच झाले एकनाथ, भागवत त्यानी लिहीले

श्री रामदास स्वामी, दासबोध रचिले

निवृती सोपान मुक्ताबाई , कित्येक झाली संत मंडळी //४//

अनेक थोरा जन्म देऊनी पावन तू झाली

शिवरायाची बातच न्यारी, दुमदुमला प्रताप

अंबेडकरांनी न्याय देऊनी, दलितास दिले योग्य माप

प्रतिकार करुनी जुलमाचा, अन्यायाला वाचा फोडली //५//

अनेक थोरा जन्म देऊनी पावन तू झाली

टिळक आगरकर साने गुरुजी, तसेच झाले फुले

सावरकर सेनापती बापट, ह्यानी शुरत्व दाखविले

सारय़ांनी महान होऊनी, देशाची मान उंचाविली //६//

अनेक थोरा जन्म देऊनी पावन तू झाली

डॉ. भगवान नागापूरकर

संपर्क - ९००४०७९८५०

bknagapurkar@gmail.com