झाडा वरल्या
खोप्या मधल्या
गुज सांगती
पिला आपल्या.... १

चारा खाऊनी
पाणी पिऊनी
घरी आपल्या
सुखी राहूनी.....२

पंखात बळ
येता बक्कळ
उडून जाती
पिले सकळ......३

पिले उडाली
आई एकली
पाखरांसाठी
हळहळली.....४

दुनियादारी
ऐक रे न्यारी
गुज सांगती
समर्थ सारी....५

-- सौ.माणिक शुरजोशी

प्रयत्न करितां जीव तोडून, जेव्हां यश तुम्हा न येई
सोडून देता त्याला तुम्हीं, नशिबास दोष देत राही..१

दोष नका देवू नशिबाला, मार्ग निवडले तुम्ही चुकीचे
का न मिळाले यश तुम्हां, मूल्यमापन करा प्रयत्नाचे...२

चूक दिशेने प्रयत्न होतां, वाहून जातो सदा आपण
यश जेव्हा मिळत नसते, निराश होवून जाते मन...३

पुनः पुन्हा प्रयत्न करूनी, यश न आले तुमचे हातीं
प्रयत्नाची दिशा बदलतां, जुळून सहजच सारे येती...४

डॉ. भगवान नागापूरकर
संपर्क - ९००४०७९८५०
bknagapurkar@gmail.com

गादी चालविते माझी आई,

माझ्याच आजीची,

मला वाटते परंपरा,

ती चाले घराण्याची ।।१।।

रात्रंदिनीचे कष्ट करणे,

हा तिचा स्वभाव,

प्रेमळपणे खावू घालणें,

मनी तिच्या भाव ।।२।।

अधिकाराची नशा तिजला,

शब्द तिचा कायदा,

जुमानत नाही कुणाचाही,

शाब्दीक तो वायदा ।।३।।

प्रेमळपणा असूनी अंगी,

अहंकार युक्त ती,

गुणदोषांनी भरले व्यक्तीत्व,

तसेच पुढे चालती ।।४।।

सोडून द्या तो अहंकारी भाव,

टिकवा प्रेमळपणा,

चक्रामधल्या गुणदोषातील,

गुणच अंगा बाणा ।।५।।

डॉ. भगवान नागापूरकर

संपर्क - ९००४०७९८५०

bknagapurkar@gmail.com

उदबत्तीचा सुगंध दरवळे चोहोकडे

कोठे लपलीस तूं प्रश्न मजला पडे १

मंद मंद जळते शांत तुझे जीवन

धुंद मना करिते दूर कोपरीं राहून २

जळून जातेस तूं राख होऊनी सारी

तुझे आत्मसमरपण सर्वत्र सुगंध पसरी ३

तुझेपण वाटते क्षुल्लक दाम अति कमी

आनंदी होती अनेक जेव्हां येई तूं कामीं ४

लाडकी तूं भक्तांना तुजवीण पूजा नाहीं

प्रफूल्ल करुन चेतना प्रभू भाव मना येई ५

डॉ. भगवान नागापूरकर

९००४०७९८५०

हपालेल्या निष्ठूर काळा, समाधानी तू कसा होशील

बळी घेण्याचे सत्र तुझे ते, केंव्हां बरे तू थांबवशील ?...१,

नित्य तुला तें भक्ष्य लागते, वेध घेई तू टिपूनी त्याचा

मिस्कीलतेने हासत जातो, गर्व होई तो स्वकृत्याचा....२,

अवचित कशी ही भूक वाढली, मात करूनी त्या वेळेवरी

सुडानें तूं पेटूनी जावूनी, बळी घेतले गरीबांचे परी....३,

काळ येई परि वेळ न आली, म्हणून सदा तूं हताश होतो

वेळेची ही ढिलाइ बघूनी, तांडव नृत्य ते करितो...४,

शांत होऊ दे क्रोध तुझा तो, बळी कुणाचा राग कुणावरी

‘वेळवरती’ अवलंबूनी तूं, जाण ठेव मनी याची तरी

डॉ. भगवान नागापूरकर

९००४०७९८५०

हिरवेगार तृणपाते,वाऱ्यावर डोलत होते,
मजेत इकडून तिकडे,
मान करत गुणगुणत होते,---

लहान बालिश वय कोवळे,
कंच हिरव्या रंगात खुलत,
खुशीत झोके घेत होते,
बाळां काय ठाऊक असे,
किती कठीण असते जगणे-?

मौजमजा आणि हुंदडणे,
करत करत एकदम कोसळणे वास्तवाशी सामना होतां,
भलेभले धुळीस मिळती,
हे तर इवलेसे तृणपाते,
कितीशी असेल लढाऊ शक्ती,-?

कुणीतरी आले तिकडून,
पाय ठेवुनी उभे राहिले,
हिरवेगार तृणपाते मग,
पायाखाली ,चुरडले गेले,--!!!

वेदना, यातना, भोग प्रवास, तृणपाते कळवळले मनांत,
चिरडल्याने कुठेतरी आंत,
उद्ध्वस्तही सर्व मनोरथ,

किती दिवस आले, आणिक
आलेले ,गेले, संपले,--!!!
तृणपाते कोलमडलेले पुन्हा,
बघां,--उठून उभे राहिले,--!!!

करूण दशा त्याची पाहून,
वारा फुंकर घाली,
काळी आई तळमळून,
खालून त्याला कवटाळी,
सूर्यराज गगनी उभे,
वरुन किरणे सोडती,
प्रकाश देऊन आपुला,
अलगद कसे कुरवाळती,
शेतातील पाटाचे पाणी,
खळबळे सारखे खाली,
थेंब थेंब देई त्याला,
अलोट जगण्याची शक्ती,--!!!

तृणपाते राहिले उभे,
एकवटून सारी जीवनशक्ती,
संकटाशी सामना करते,
सरतेशेवटी इच्छाशक्ती,--!!!!

एवढेसे असून तृणपाते,
शिकवी केवढे आपणां,
डोंगर कोसळले संकटांचे,
तरी दाखवा कणखरपणां,--!!!!

हिमगौरी कर्वे.©

वृंदावनी रंगला शाम माझा, वृंदावनी रंगला

राधे मध्ये गुंतला शाम माझा वृंदावनी रंगला

लहानपणी एक डाव मांडीला नवरा नवरी लग्न सोहळा

भातुकलीच्या खेळा मध्ये राधिकाने राम शोधीला

वृंदावनी रंगला शाम माझा, वृंदावनी रंगला

राधे मध्ये गुंतला शाम माझा वृंदावनी रंगला

गाठ मनाशी मारुनी माझ्या घनशाम तू कुठे निवळला

वाट बघते वृंदावनी डोळे मथुरे्च्या बाजारी रमला

वृंदावनी रंगला शाम माझा, वृंदावनी रंगला

राधे मध्ये गुंतला शाम माझा वृंदावनी रंगला

देठ पिवळा झाला एव्हाना राधा शोधीत आली कान्हा

वैकुंठाशी जाइ पूनिता अखेरचा सूर पडती काना

वृंदावनी रंगला शाम माझा, वृंदावनी रंगला

राधे मध्ये गुंतला शाम माझा वृंदावनी रंगला

देवाचा तो देवही रडला बासरी तोडून तीरी बैसला

येईल राधा पुन्हा पाण्याला अश्रूंची घागर भरीत राहिला

वृंदावनी रंगला शाम माझा, वृंदावनी रंगला

राधे मध्ये गुंतला शाम माझा वृंदावनी रंगला

मधु दारसेवाड......

खोड्या करणे, त्रास देणे, हाच बनला स्वभाव त्याचा

वाटत होते बघून त्याला, दूरोपयोग करि तो शक्तीचा...१

पाय ओढणे, खाली पाडणे, कपड्यावरी तो चिखल फेकणे

मारपिट ती करूनी केंव्हां, गुंडपणा तो करित राहणे...२,

बेफिकीर ती वृत्ती तयाची, स्वार्थाने तो भरला पुरता

तुच्छ लेखी इतर जनाना, स्व आनंद साधत असतां....३,

'आनंद' मिळवणे हेच ध्येय, जीवनाचे तत्त्व खरे ते

विपरीत मार्ग अवलोकितां, समाधान राही दूर तेथें...४

डॉ. भगवान नागापूरकर

९००४०७९८५०

मराठी राजभाषा दिनाच्या सर्व मराठी बांधवाना हार्दिक शुभेच्छा!
मराठी माय माझी...

मराठी माय माझी...
ममतेचा करते वर्षाव मजवरी...
मराठी माय माझी...
ममतेने करते संस्कार मजवरी...

मराठी माय माझी...
ममतेने मला शिकवण देणारी...
मराठी माय माझी...
ममतेने मला वळण लावणारी...

मराठी माय माझी...
ममतेने माझ्या आवडी जपणारी...
मराठी माय माझी...
ममतेने माझ्या कला जोपासणारी...

मराठी माय माझी...
ममतेने मज मार्ग दाखविणारी...
मराठी माय माझी...
ममतेने मज जमिनीवर ठेवणारी...

मराठी माय माझी...
ममतेने माझे डोळे उघडणारी...
मराठी माय माझी...
ममतेने माझे जीवन घडविणारी...

कवी – निलेश बामणे ( एन.डी. )