चकित झाले गोकूळवासी
बघून बाललीला
सांगा कोण आहे तरी कृष्ण ?
विचारी यशोदेला ।।१।।

प्रासादातील मोदक खातां
तोंड ते उघडले
मुखामध्ये मोदक नसूनी
ब्रह्मांड ते दिसले ।।२।।

उच्छाद मांडूनी कालीयाने
पाणी केले दुषित
मर्दन करण्यासाठीं त्याचे
उडी टाकी डोहात ।।३।।

पूतना असूनी राक्षसिण
स्तनांत होते विष
स्तनपान करुनी त्यानें
तीला केले कासाविस ।।४।।

खोड्या बघूनी यशोदेनें
उखळाला बांधले
उखळासहीत झाडे पाडूनी
चकीत त्यानीं केले ।।५।।

अनेक अशा लीला करुनी
अचंब्यात पाडले
बालमुर्ति तो ईश असूनी
सर्वांस गुंगविले ।।६।।

डॉ. भगवान नागापूरकर
९००४०७९८५०

जळत होती मेणबत्ती,
मंद मंद प्रकाश देवूनी ।
अंधकार भयाण असतां,
भोवताली उजेड पाडूनी...१,

बुडत्यासाठी काडीचा आधार,
अंधारी भासली तशी प्रकाशीं ।
असूनी ज्योत मिणमिणती,
त्या क्षणी वाटला सूर्य आकाशी....२,

वाटत नाहीं मूल्य कुणाला,
भरपूर पडल्या प्रकाशाचे ।
मेणबत्तीची ज्योत शिकवी,
साधे तत्त्व जीवनाचे....३

डॉ. भगवान नागापूरकर

संपर्क - ९००४०७९८५०

bknagapurkar@gmail.com

श्रीराम जन्म कथा

श्रीरामाचा अवतार दुष्टांचा करण्या संहार
जन्म घेतला पृथ्वीवर परमेश्वरानी //१//
रामासी लाभले मोठेपण तयाठायीं तन मन धन
अर्पिती सर्व भक्तजन प्रेमभरे //२//
थोर ग्रंथ रामायण त्यातील जन्मकथा निवडून
करीत असे अर्पण तुमचेसाठीं //३//
लंकाधीपती रावण होता शिवभक्त महान
उन्मत्त झाला वर पावून त्रास देई सर्वाना //४//
युद्ध केले स्वर्गासी बंदी केले देवांसी
छळूं लागला तयांसी दुष्टपणानें //५//
रावणाच्या त्रासा पोटीं देवांच्या मुक्तीसाठीं
अवतार घेई जगत् जेठी श्रीराम जन्म घेऊनी //६//
आयोध्येचा दशरथ राजा आनंदी होती प्रजा
सुखी बघण्यात मजा त्यास वाटे //७//
एक दुःख होते त्यास पुत्राविना जात दिवस
पुत्र प्राप्त करण्यास प्रयत्न केले बहूत //८//
राजा जाई वशिष्ठ गुरु कडे घालूनी त्यास साकडे
पुत्राविना वंश न वाढे मार्ग सुचवावा //९//
वशिष्ठ गुरु सुचविती यज्ञ करण्या सांगती
पुत्रकामेष्टी यज्ञ महती आगीच असे //१०//
गुरुंचा आशिर्वाद घेऊनी राजा निघाला तेथून
संकल्प केला दशरथांनी पुत्रकामेष्टी यज्ञाचा //११//
श्रृंगऋषी महान होते तप सामर्थवान
विनवितसे जाऊन त्यांचे आश्रमी //१२//
पाद्यपुजा त्यांची करुनी भक्तिभावे विनवूनी
यज्ञासाठीं पाचारण करुनी तयासी बोलावले //१३//
मंडव घातला भला यज्ञाचा भव्य सोहळा
ऋषीगण ब्राह्मण सगळा यज्ञासी जमती //१४//
यज्ञांत आवाहन केले सर्व देव निमंत्रिले
हविर्भाव सर्वासी दिले श्रृंगऋषीनें //१५//
स्पष्ट मंत्रोपचार म्हणून सर्व ऋषी एकसूर धरुन
अग्नीसी टाकती हवन राजा दशरथ // १६//
प्रसन्न झाली यज्ञदेवता पायस कलश हातीं देता
समान भाग राण्यांस वाटता पुत्र प्राप्त होई //१७//
दशरथाच्या राण्या तीन कौसल्या सुमित्रा नि कैकयी लहान
आनंदी झाल्या पायस बघून यज्ञाचा प्रसाद //१८//
कैकयी बसली रुसून पट्टराणी मी लहान असूनी
प्रथम भाग कौसलेस देवून अपमान माझा होई //१९//
प्रसाद घेवूनी बैसली मनीं विचार करुं लागली
तत् क्षणी एक घार आली प्रसाद जाई घेऊन //२०//
सर्वजण होती चकीत कांही समजण्याचे आंत
एक भाग घार नेत आकाशी उडाली //२१//
कैकयी झाली दुःखी शब्द निघेना मुखी
प्रसंग ओडावला एकाएकीं तिचेवर //२२//
आपल्या प्रसादातील भाग देवून कैकयीस सांग
सोडून द्यावा तुझा राग विनवितसे दोन्ही राण्या //२३//
चैत्रशुद्ध नवमीला राम जन्म झाला
कौसल्या मातेला आनंद होई त्रिभुवनी //२४//
सुमित्रेचा लक्ष्मण कैकयीस भरत शत्रुघ्न
चार पुत्र मिळून पितृत्व दिले दशरथासी //२५//
आदर्श जीवन जगला पितृआज्ञे वनवास सोसला
मारिले दुष्ट रावणाला यशस्वी केले रामराज्य //२६//
रामाचा महीमा थोर परमेश्वराचा तो अवतार
भक्तांचा करी उद्धार त्याचे आशिर्वादे //२७//
एक पत्नी, वचनी, बाणी सत्य आणि प्रेमळ वाणी
अद्वितीय गुणांच्या खाणी रामासी ठरवी पुरुषोत्तम //२८//
रामाचे जीवन भव्य आदर्शमय ते काव्य
दाखवोनी जगाला दिव्य ठाव घेई सर्वा मना //२९//
रामनामी मोठेपण जाईल तो उद्धरुन
संकटे जात निघून आठवण येता त्याची //३०//
रामरक्षा स्तोत्र पठण करी तुमचे देह रक्षण
नित्य नियमें वाचन मनोभावें //३१//
" शुभं भवतु "

डॉ. भगवान नागापूरकर
५-०१११८३

पाऊलोपाऊल चालत जाते,
मनामधली एक वारी,
ना टाळ, ना मृदुंग हाती,
तरी भक्तीची गोड तयारी.

रस्ता नाही धुळीचा येथे,
ना दिंडींची गर्दी भारी,
अंतर्मनाच्या शांत वाटेवर,
अखंड सुरू ईश्वराची वारी.

सुख-दुःखांचे डोंगर ओलांडत,
आशा-निराशेच्या पलीकडे सारी,
प्रत्येक श्वासात नाम गुंजते,
हीच खरी जीवनवारी.

अहंकाराचे ओझे टाकून,
प्रेमाची घेऊन शिदोरी,
करुणा, श्रद्धा, सत्य सोबती,
नेते आत्म्याला प्रभूच्या दारी.

कधी अश्रूंनी पाऊल भिजते,
कधी आनंदाची फुले फुलती,
तरी न थांबे हा अंतःप्रवास,
ओढ लागलेली पंढरीची न्यारी.

शेवट नसतो या प्रवासाला,
ना थांबे कधी ही स्वारी,
ईश्वर भेटतो अंतःकरणी,
जेव्हा पूर्ण होते मनाची वारी.

•ॲड.कीर्तिराज शैलेंद्र आगलावे, पुणे ✨
मो:- 9011841212

प्रदीप निफाडकरांची गझल

दत्त मनी दत्त ध्यानी
अवधूत चिंतन श्री गुरुदेव
कर्म माझे जाणिले तूम्ही
चित्त तुम्हा ठायी सदैव

दत्त नामस्मरण नित्य
पुण्य काळ सुखाचा..
मोक्षार्थी करीतसे गमन
भक्त गुरू दत्तांचा..

दत्त वसले औंदुबरी
भोवताली श्वान गाई
कृपेचा भवसागर
ध्यानस्थ कृष्णा माई..

चराचरात पाहतो
गुरु विना कोण तारक
ब्रम्हा विष्णू महेश
एका स्थळी चित्तवेधक

प्रतिभा चौगले यांच्या प्रतिभास या कवितासंग्रहाच्या इ-पुस्तकातील ही कविता.
हे इ-पुस्तक आपण खालील लिंकवर खरेदी करु शकता.

किंमत : रु.८०/-
सवलत किंमत : रु.५०/-

https://marathibooks.com/books/pratibhas-by-pratibha-chougale/

मी तुझी शाई बनू इच्छिते
मी शब्दांच्या त्या गल्लीत जाऊ इच्छिते
जिथे कविता कथेच्या गळ्यात गळा घालून
चालत असते,
माझ्या तमाम दुःखाच्या,
पराभवाचे विष प्राशन करणाऱ्या
नीलकंठ लेखणीला
सृजन करण्याचे सौंदर्य मला बहाल कर,

मी या शाईने लिहू शकेल
या प्रकाशमान विश्वाचे सफेद अक्षर
मला सांभाळून घे लेखणी
मी तुझी शाई बनू इच्छिते.

मी कागदाच्या देहावर गोंदण होऊ इच्छिते
मी जगाशी व्यक्त होऊ इच्छिते की
कागदाच्या संगमरवरी देहावर
लिहीन मी एक प्रार्थना
जी ताजमहल पेक्षा अधिक सुंदर असेल,

मला घडवण्याची ताकद दे ब्रह्मा !
मी तो हातोडा होऊ इच्छिते
माझा मान अपमान
माझा संघर्ष
माझी ओळख
या सर्वांना ओलांडून गुंजत राहू इच्छिते
मी शब्द नाद होऊ इच्छिते

मूळ हिंदी कविता - " मैं तेरी रोशनाई होना चाहती हूँ "

- अलका सिन्हा

मराठी अनुवाद - विजय नगरकर

कविता

स्फुर्ति येऊन कविता केली आनंद झाला मनीं ।
चटकन कागदावरी लिहीली शब्द येतां ध्यानी ।।

कवितेतील शब्दरचना झाली बहरदार ।
कौतूकाची येई भावना बघुनी शब्द भांडार ।।

पुर्ण करुनी कविता टिपूनी घेतली वहीत ।
काव्य रचना परत वाचतां मग्न झालो आनंदात ।।

फेकूनी दिला कागद ज्यावरी रचिली कविता ।
विचारांत होतो धुंद कृत्य केले मी अजाणतां ।।

अघटित घटना झाली काव्य स्फुर्ति गेली निघूनी ।
नंतर मजला काव्य सुचेना बेचैन झालो मनीं ।।

चूक मनां उमगली अपमान केला अजाणतां ।
शारदा कागदावरी अवतरली बनोनी एक कविता ।।

खिन्नता वाटली मनासी कागद घेतले उचलून
निर्माल्य समजोनी त्यासी गंगाजलीं केले अर्पण ।।

पुनरपि सुचले काव्य लिहूं लागलो कविता ।
शब्द रचना भव्य लेखणीतून उतरतां ।।

अनावधाने झाला मजकडूनी अपमान ।
प्रायश्चित्त घेतां गेला शारदेचा राग निघून ।।

डॉ. भगवान नागापूरकर
९००४०७९८५०
bknagapurkar@gmail.com

आला उन्हाळा आला घेऊन गरम गरम हवेच्या झळा
अंगाची करीत लाही जीवाची करीत काहिली

घामाच्या घेऊन धारा पंख्याचा शीतल वारा
तहानेने पाणी-पाणी शीतपेयांची आणीबाणी

सरबतांचा शितल मारा सगळे फ्रीजमध्ये सारा
आइस्क्रीमचा चाटा मलिदा सोबत थंडगार फालुदा

पेप्सी आणि कोकची जोडी गुलाबजाम वर कुल्फीची उडी
सर्दी खोकल्याची जोड गोळी उन्हाळ्याची दोस्तमंडळी

घराघरातून रहदारी उन्हाळी औषधांची घुसखोरी
डॉक्टरांची पायरी पाय ठेवायला जागा नाही वरी

आला उन्हाळा घेऊन गरम हवेच्या झळा
ये रे बाबा पावसा नको रुसून बसू असा

-- विनायक अत्रे.