कविता-गझल-चारोळी-वात्रटिका

ही कविता राज्यव्यापी शिक्षक साहित्य संमेलनासाठी , श्री बबलू वडार (शिक्षक -कोल्हापूर) यांनी लिहिली होती. कविता पठण स्पर्धेत त्यांना पहिला नंबर मिळाला.

Out dated झालंय आयुष्य
स्वप्नही download होत नाही
संवेदनांना 'virus' लागलाय
दु:खं send करता येत नाही

जुने पावसाळे उडून गेलेत
delete झालेल्या file सारखे
अन घर आता शांत असतं
range नसलेया mobile सारखे

hang झालेय PC सारखी
मातीची स्थिती वाईट
जाती माती जोडणारी
कुठेच नाही website

एकविसाव्या शतकातली
पीढी भलतीच 'cute'
contact list वाढत गेली
संवाद झाले mute

computer च्या chip सारखा
माणूस मनानं खुजा झालाय
अन 'mother' नावाचा board,
त्याच्या आयुष्यातून वजा झालाय

floppy Disk Drive मध्ये
आता संस्कारांनाच जागा नाही
अन फाटली मनं सांधणारा
internet वर धागा नाही

विज्ञानाच्या गुलामगिरीत
केवढी मोठी चूक
रक्ताच्या नात्यांनाही
आता लागते facebook................

-- श्री बबलू वडार (शिक्षक -कोल्हापूर)

हक्क तुझा,हक्क माझा,
हक्क याचा अन त्याचाही.....
पण मला एक सांगा.....
हक्क कधी हक्काचा आहे का हो...?
एकदा आसच चालत आसतांनी....
रस्त्यानं.....!
अविरत पहात व्हतो....
वेगवेगळे रूपं....
ना निरगुण न ही निराकार....
ते तं होते,
आंकुचित....,
अन संकुचितही.....!
व्याख्याच बदलली व्हती
हक्कानं आपली....
सिस्टीममध्ये व्हायरस घुसुनं
फाईल करप्ट व्हावी
तसा करप्ट झालता हक्क....!
अन मंग काय,
हक्कानं आपलीच संस्थानं तय्यार केली.......
आपल्याच
हक्काची......!!!
स्वतःचीच......
स्वतःसाठी
हक्कानं चालवलेली.....!
हक्कालं वावडं व्हतं....
गरीबाच्या घामाच,
भटक्याच्या पालाचं,
श्रमिकाच्या झोपडीचं
अन विद्रोहाच्या चोपडीचं...!!!
हक्क पोचलाच नाही कधी
रंजल्याजवळ बी आन गांजल्याजवळ बी.....
ना पालात,ना रानात,
नाही झोपडीत.....!
तो तं.....
आरामात राबतोय......
संस्थानिकांच्या महालातं.....
हक्कानं....!!!

©गोडाती बबनराव काळे, हाताळा,हिंगोली
9405807079

आम्रवनांतील शोभा बघत, भटकत होतो नदी किनारी

मैनेची ती ओरड ऐकूनी, नजर लागली फांदीवरती...१

एक धामण हलके हलके , घरट्याच्या त्या नजीक गेली

पिल्लावरती नजर तिची, जीभल्या चाटीत सरसावली...२,

मैनेच्या त्या मातृहृदयाला, पर्वा नव्हती स्वदेहाची

जगावयाचे जर पिल्लासाठी, भीती न उरी ती मृत्यूची...३

युक्त्या आणि चपळाईने, तुटून पडली त्या मृत्यूवरी

रक्त बंबाळ ते केले शरीर, चोंच मारीत धामणीवरी....४

अखेर धामण वृक्ष सोडते, जखमी होवूनी शरिराने

पिल्लामध्ये बसूनी मैना, शांत करिते हृदय स्पंदने

डॉ. भगवान नागापूरकर

९००४०७९८५०

जीवन हर घडिला अवलंबूनी, आहे दूजावरी
व्यर्थ मग कां अभिमान, बाळगतोस उरी

नऊ मास होता गर्भामध्यें, जेंव्हा आईच्या
शोषण केले अन्न सारे, रक्तामधूनी तीच्या

माता पित्याच्या कष्टाचा तो, घाम गळत होता
तुझे बालपण फुलविण्या, ओलावा देत होता

घर गृहस्थीचे सुख भोवतीं, पत्नी मुला पासूनी
समाधान ते मिळतां तुजला, गेला बहरुनी

वृद्धत्वाला काठी लागतें, स्थिरावण्या तोल सदा
हातभार तो देईल कुणी, विवंचना हीच अनेकदा

मृतदेह जर तसाच पडला, किडे मुंग्या खाती
त्याही क्षणी मदत लाभूनी, चिता-अग्नी देती

जन्मापासूनी मृत्युपर्यंत, परावलंबी जीवन
कुणी तरी दिले तुजसाठीं, हे घे जाणून

-- डॉ. भगवान नागापूरकर
९००४०७९८५०
bknagapurkar@gmail.com

लक्ष आपले जात असते,

सदैव प्रभूकडे,

मार्ग सारे ठरलेले,

जे मिळती तिकडे ।।१।।

‘को S हं’ शब्दाचा निनाद होतो,

प्रथम मुखातून,

जन्मताच तो प्रश्न विचारी,

“मी आहे कोण?” ।।२।।

मार्ग हा तर सुख दु:खाने,

भरला आहे सारा,

राग लोभ मोह अंहकार,

याचा येथे पसारा ।।३।।

वाटचाल करिता यातून,

कठीण होवून जाते,

जीवन सारे अपूरे पडून,

अपूर्ण ज्ञान मिळते ।।४।।

आयुष्य तुमचे थोडे असूनी,

काळ वेळीच जाणावा,

मिळेल जो क्षण तुमचे हातीं,

प्रभूसाठी तो असावा ।।५।।

डॉ. भगवान नागापूरकर

संपर्क - ९००४०७९८५०

bknagapurkar@gmail.com

https://youtu.be/6jJb1bH8qmw

मित्रांनो, स्वातंत्र्य दिनानिमित्त "फक्त एका दिवसासाठी" हि कविता आपल्यासाठी सादर करीत आहे.
मराठी कविता आवडली तर share करायला विसरू नका.
"माझी डायरी " या आपल्या youtube चॅनलला अवश्य Subscribe करा.
"माझी डायरी" आपल्यासाठी आणखी नव्या कविता-गझल-कथा घेऊन येत आहे.

भरवशाची घेऊन शिदोरी, पाऊलवाट ती चालत होता
कुणीतरी आहे मार्गदर्शक, ह्यापरी तो अजाण होता

बरसत होती दया त्याची, जात असता एक मार्गानी
आत्मविश्वास डळमळला, बघूनी वाटेमधल्या अडचणी

संशय घेता त्याचे वरती, राग येई त्याच कारणें
विश्वासाला बसतां धक्का, आवडेल कसे त्यास राहणे

ओढून घेई मृत्युचि आपला, अकारण तो त्यास दुरावूनी
जागृत होता पुनरपि विश्वास, संशय जाई दूर पळूनी

-- डॉ. भगवान नागापूरकर
९००४०७९८५०
bknagapurkar@gmail.com

ओटी भरण आज कौतुकाचे
हवे नको काय ते तूच सांगायचे
ओटी भरण आज कौतुकाचे ।।धृ।।

शालू हिरवा जरतारी काठ
चंदनाचा पाट पक्वान्नांचे ताट
श्रीखंड खिरीला रंग केसराचे ।।१।।

मोगरा अंबोली, दवणा मरवा,
रूपाराणीला या, मखरी मिरवा,
मुखावरी तेज विलसे गर्भाचे ।।२।।

सुगंधित वाळा, उटी चंदनाची
हौस पुरवा फळांची फुलांची,
डोहाळे जेवण रात-चांदण्यांचे ।।३।।

कौसल्येचा राम, देवकीचा शाम,
असेल तयाचे रूप मनोरम,
पडसाद कानी घुंगुर वाळ्याचे ।।४।।