विचार, भावना अंतरज्ञान, संगत असते तिन्हीची

यशस्वी करण्याजीवन, मदत लागते सर्वांची....१

तर्कशुद्धता ठरण्यासाठी, विसंगतीचा घेई आधार

जीवनाचे सत्य उकलन्या, बुद्धी करीत राही विचार...२,

राग लोभ प्रेमादी गुण, जीवनाची चमकती अंगे,

‘भावनेचा’ आविष्कार होतां, एकत्र सर्वां चालन्या सांगे....३,

शोध घेत असता सत्याचा, अनेक अडचणी त्या येई,

सत्य हेच असूनी ईश्वर, अंतरज्ञान तेच पटवी....४

डॉ. भगवान नागापूरकर

९००४०७९८५०

ॲडमिशन मिळाले! पुजा घाला ....

नाही मिळाले ? पुजा घाला ....

पास झालात !पुजा घाला ......

नापास झालात ? पुजा घाला ....

नोकरी मिळाली! पुजा घाला ...

नाही मिळत ? पुजा घाला ....

प्रमोशन मिळाले ! पुजा घाला ...

नाही मिळत ? पुजा घाला ...

घर घेतलेत ! पुजा घाला ...

घेता येत नाही? पुजा घाला ...

लग्न जमले ! पुजा घाला ....

नाही जमत ? पुजा घाला ....

अच्छा! ... लग्न झाले पुजा घाला ....

मुल झाले ! पुजा घाला ...

नाही होत ? पुजा घाला ...

मुलगीच झाली ! पुजा घाला ....

मुलगाच पाहिजे? पुजा घाला...

गाडी घेतलीत ! पुजा घाला ...

गाडी ठोकलीत ? पुजा घाला ....

आजारी पडलात ! पुजा घाला ....

बरे झालात ? पुजा घाला ....

जिवंत माणसांसाठी पुजा घाला ....

मेलेल्या लोकांसाठी पुजा घाला ....

आता जरा विचार करा .....

याच्यात फायदा कुणाचा झाला...... ?

पटत असेलतर डोक्यात घाला .... आणि पटत नसेल तर तुम्ही आपली ...... ..............

पूजाच घाला ......

शब्द जरी जाहले अबोल
मौनी मन, मनाशी बोलते

द्वंद्व! ते सत्य, असत्याचे
जीवाला सदा खात असते

कर्म! मनी बिलोरी आरसा
स्वचे, खरे प्रतिबिंब दिसते

जरी प्रतारणा जगाशी केली
सत्यता उरीची जीवा छळते

सर्वांती नोंदणी ती चंद्रगुप्ती
लेखाजोखा, सामोरी मांडते

जन्म! कर्म विवेकी, संचिती
अर्थ! मुक्ती, मोक्षाचा सांगते

प्रीती, सद्भावना सदा सांगाती
सत्य! सूर्यप्रकाशी समोर येते

-- वि. ग. सातपुते. (भावकवी)

9766544908

रचना क्र. ३९.

८ - २ - २०२२.

वेळ येता उकल होते,
साऱ्या प्रश्नांची ।
जाणून घ्या तुम्ही,
रीत निसर्गाची...१,

जेंव्हां यश ना मिळते,
एखाद्या प्रश्नी ।।
वेळ नसे योग्य आली,
हेच घ्यावे जाणूनी...२,

प्रयत्न सारे चालूं ठेवतां,
यश ना मिळे ।
कांहीं काळासाठी थांबवा,
प्रयत्न सगळे...३,

काळ लोटतां प्रयत्न होती,
पुनरपि सारे ।
उकल होऊन गुंत्यांची,
आख्खे निघती दोरे...४,

कुणी म्हणती ग्रह अनूकुल,
ह्या घटनेला ।
हीच तर वेळेची किमया,
कशी कळे कुणाला....५

डॉ. भगवान नागापूरकर
संपर्क - ९००४०७९८५०
bknagapurkar@gmail.com

चालली स्पर्धा साऱ्यांची, प्रभूची सेवा करण्याची....।।धृ।।

निशाराणी संचारी

निद्रीत जाई पहारेकरी

खट्याळ वारे धावूनी

दारे दिली उघडूनी

विज चमकूनी आकाशी मदत होई वसुदेवाची....१

चालली स्पर्धा साऱ्यांची प्रभूची सेवा करण्याची

पावसाच्या पडती सरी

पक्षी नाचती तालावरी

कोकीळेचे सुरेल गान

आनंदाने वातावरण

नागराजा फना काढूनी काळजी घेई नव बाळाची....२

चालली स्पर्धा साऱ्यांची प्रभूची सेवा करण्याची

स्पर्श होता पायाचे

पाणी दुभंगले यमुनेचे

वाट त्याची करूनी

काढूनी साऱ्या अडचणी

नंदाघरची कन्या माया दाखवी रूपे चमत्काराची...३

चालली स्पर्धा साऱ्यांची प्रभूची सेवा करण्याची

-- डॉ. भगवान नागापूरकर

9004079850

bknagapurkar@gmail.com

जीवन असावे गुलाबा सारखे,

सहवासे ज्याच्या मिळताती सुखे ।।१।।

सुगंध तयाचा दरवळत राही,

मनास आमच्या समाधान होई ।।२।।

नाजूक पाकळ्या कोमल वाटती,

सर्वस्व अर्पूनी गुलकंद देती ।।३।।

विसरूं नका ते काटे गुलाबाचे,

बसती लपूनी खालती फुलांचे ।।४।।

सुखाचे भोवती सावट दु:खाचे,

जीवन वाटते झाड गुलाबाचे ।।५।।

डॉ. भगवान नागापूरकर

९००४०७९८५०

समोर ये तूं केंव्हा तरी,
बघण्याची मज ओढ लागली,
फुलूनी गेली बाग कशी ही,
बीजे जयांची तूच पेरीली ।।१।।

कल्पकता ही अंगी असूनी,
दूरद्दष्टीचा लाभ वसे,
अंधारातील दुःखी जनांची,
चाहूल तुज झाली असे ।।२।।

शीतल करुनी दुःख तयांचे,
जगण्याचा तो मार्ग दाखविला,
सोडूनी सारे वाटेवरी,
आकस्मित तू निघूनी गेला ।।३।।

आस्तित्वाची चाहूल येते,
आज इथे केंव्हातरी,
तव आशीर्वादे जगतो सारे,
हीच पावती त्याची खरी ।।४।।

डॉ. भगवान नागापूरकर
९००४०७९८५०

आज मागे वळून पाहताना मला उमगतेय की
मला माझं अस्तित्व नाही... किंबहुना नव्हतेच कधीही
कारण मी अंश आहे- तुमचाच वंश आहे
तुमचाच मी भाग आहे- थोडा आईचा थोडा माझ्या पप्पांचा

मग इतक्या उशिरा का या जाणीवांची जाण यावी
अर्ध आयुष्य उलटल्यावर- स्पंदने का तीव्र व्हावी

शक्तींच्या माझ्या उगम तुम्ही नि स्त्रोतही माझ्या न्यूनत्वाला
निर्मीती तुमचीच मी; भास माझ्या आकृतीला नि रंग आहे प्रकृतीला .
अश्रू माझ्या अपयशाचे नि दुदुंभीही यशाची तुमचीच आहे
वेदना-संवेदनांना आपल्या तारही तर एकच आहे

आयुष्याच्या खडतर चढणीवर होता मला तुमच्या बोटांचा आधार
माझ्या वाढल्या हातांनी मग का न जपावा आता तुमचा उतार
मला माझा ध्यास आहे, ध्येय आहे, आशा नि महत्वाकांक्षाही
पण अभिलाषा त्या यशोशिखरांची मला यत्किंचितही नाही
जेथे हाक तुमची मला ऐकू येणार नाही
जमलंच तर आभाळात झेपावण्याचं वेड मला जरुर असावं
पण इतकंही नाही की सावलीला तुम्हा झाकायचं धाडस व्हावं

छातीचा कोट उभारला तुम्ही डेरेदार वृक्षाच्या निष्ठांनी
जपली उभारी उमलत्या मनांची रणरणत्या मध्यान्ही
मग त्या थकल्या भागल्या पारंब्यांना तजेला शिंपडावया
आमच्या मायेचा ओलावा आतूर का नसावा!
हुडहुडल्या शाखा जर, हळूवार शाल का आम्ही न पांघरावी
विसावण्यास त्यांना निवांत आमच्या खांद्यांचा निवारा
वावरण्यास अन्‌ ऐसपैस का नसावा मनाचा गाभारा

रचल्या होत्या उन्हांत तुम्ही विटा घराच्या या वेड्यासाठी
त्या श्रमांची झाली लेणी बनून काळजातल्या मर्मबंधांच्या नर्म गाठी
वाटते तुम्ही विसावे अन्‌ धराव्या आम्ही कमानी सावलीला
आपुलकीची लावू बिछायत पखरुन स्नेहाचा सौम्य परिमळ
चित्तवृत्तींच्या करुन वाती, उजळावी प्रसन्न संध्याकाळ
आठवणींचे उठवावे मोहोळ, नेमक्या टिचक्या मारुन
फुलवावा चहुअंगी मोहोर, स्पंदनांना साक्षी ठेवून
ओंजळीत साठवावे, निसटते क्षण, आयुष्यभर हुंगण्यासाठी
उचंबळत्या भावनांत भिजावे, करावे बंदिस्त आवेगाची घालून मिठी

संध्याछायांनाही करावे मोहक, लोभसवाणं
वीणेच्या हृदय छेडणाऱ्या झंकाराप्रमाण॑
झुंजुमुंजुचा घेत कानोसा, करीत जयकार रामाचा
निश्‍चिंत व्हावे शांत सोबतीने दूरच्या चंद्राच्या

ज्यांनी शिंपली माती आपली उभं आयुष्य खर्ची घालून
त्यांना जीवनवृक्षाची करावी बहाल किमान काही फुले मनापासून
कधी वाटतं उधळाव्या आपल्या आयुष्याच्या करुन कगाठी
लख्ख उजळावे त्यांनी क्षण दोन क्षण केवळ तुमच्यासाठी

अज्ञानापासून ते अज्ञाताच्या प्रवासापर्यंत, अविरत
एका मानवाची आपल्या मनुला कृतकृत्य कृतज्ञता ॥

-अंत:करणपूर्वक

--यतीन सामंत

“साहेबांचा उत्तराधिकारी कोण?”
हा प्रश्न मोठ्याने विचारला गेला,
पण त्यामागे दडलेली भीती
कुणालाच ऐकू आली नाही.

दादा होते म्हणून
भिंती भक्कम वाटायच्या,
त्यांच्या शांत उपस्थितीत
वादळही सौम्य भासायचं.

कधी वाटलंच नव्हतं,
की दादांचा उत्तराधिकारी
शोधण्याची वेळ येईल,
तो दिवस फार दूर आहे
असं सगळ्यांनाच वाटलं.

पण काळ थांबत नाही,
तो कुणासाठी थांबत नाही,
आणि एका न बोलल्या क्षणी
सगळं हळूच बदलून जातं.

साहेबांना पुढे पाहायचं होतं,
मार्ग आखायचा होता,
पण नियतीनं त्यांच्या हातात
दादांचा वारसा दिला.

दादांचा उत्तराधिकारी
साहेबांना व्हावं लागणं
हा विजयाचा क्षण नव्हता,
तो एक असा क्षण होता
जिथे डोळे ओलावतात
आणि शब्द गळून पडतात.

काही नाती घोषणा मागत नाहीत,
ती जबाबदारी बनून येतात,
आणि काही वारसे
साजरे करण्यासाठी नसतात,
ते शांतपणे पेलण्यासाठी असतात.

आजही प्रश्न तसाच आहे,
पण आवाज मंद झाला आहे,
“उत्तराधिकारी कोण?”
याऐवजी आता
“हा वारसा सांभाळता येईल ना?”
असा तो हळूच विचारतो.

•ॲड.कीर्तिराज आगलावे

नको लागूस प्रसिद्धीच्या मागें मागे
येईल स्वयं ती तुझ्याच संगे संगे
निराशूनी जावू नकोस रागें रागें
हिंमत बांधूनी जावेस तू आगे आगे
विणाविस तू यशाची शाल धागे धागे|
सुखाच्या छटा चमकूनी रंगे रंगे
सतत रहावे जीवनी जागे जागे
तेव्हाच यश येत असते भागे भागे

डॉ. भगवान नागापूरकर
९००४०७९८५०
bknagapurkar@gmail.com