कविता-गझल-चारोळी-वात्रटिका

कुठे नाही स्वरूप देवा, बघायला मिळत आम्हा,
काळीज नमते तुज पाहता,
चराचरातील या घटका, ---

निसर्ग मज वाटतो,
तुझेच रुप देवा,
तिथेच आम्ही तुला मानतो,
स्वरूप कोणते का असे बा,

ना तू कुठल्या देवळा,
ना कुठल्या मंदिरी,
प्रत्येकाच्या हृदयी
बसशी,असशी तू हरी,----
प्रेम, माया, ममता,
आपुलकी, जिव्हाळा,
कुठे तू नसशी
फक्त सांग मज गा ,---!!!!

माणुसकी जे जपती,
त्यांच्या मनोमनी तू ,
दया करुणा अहिंसा,
दाखवीत प्रगटशी तू,--!!!.

अनोळखी हात करता,
निरपेक्ष ती सहाय्यता,
बापुड्या दीन -दुबळ्या,
जिवांचा तू रक्षण कर्ता,--!!!

संकटात कोण पुढे येई,
कोण देईल अमोल दिलासा,
कोण आपला हात देई,
असता कुठली अवघड वेळा,--!!!

वैविध्य अन् वैचित्र्य ,
पाहुनी माणूस चकित होई,
कोण नेई शेवटास,
जिंकता जरी कुठली लढाई,--!!!

नीतिमत्तेची चाड नसता,
कोण ओढे फटकारे,
आत्म्यातला परमात्माच दाखवी, आपुले अस्तित्व बरे,--!!!!

© हिमगौरी कर्वे.

खेळत होता बाळ अंगणीं इकडूनी तिकडे

मेघनृत्य ते बघत असतां दृष्टी लागे नभाकडे

उलटी सुलटी कशी पाऊले घनांची पडत होती

लय लागून हास्य चमकले त्याच्या मुखावरती

तोच अचानक गडगडाट झाला एक नभांत

दचकून गेले बाळ तत्क्षणी होऊन भयभीत

धावत जावून घरामध्यें आईला बिलगले

वाचविण्या त्या भीतीपासून पदराखालीं दडले

जरी थांबला गडगडाट भीती कायम होती

आवाजाचे नाद अद्यपि कानीं त्याच्या घुमती

भीतीने नजिक चिकटला आईच्या जवळीं

धडकन ऐकूं आली त्याला पुनरपि त्यावेळीं

गडगड धडधड आवाजाचा धसका घेवूनी मनीं

तोंड लपविले हळूंच जाऊन गादीमध्यें त्यानी

पिच्छा न सोडी आवाज अजूनी बसली ज्याची भिती

श्वास वाढूनी, स्वह्रदयाची धडकन होती ती

तगमग बघूनी बाळाची ती थोपटे मांडीवर आई

निद्रेच्या तो अधीन झाला ऐकून मधूर अंगाई

डॉ. भगवान नागापूरकर

९००४०७९८५०

सारे धर्म मानव निर्मीत

त्यांतच आणली जातपात ।।

सर्व धर्म महान

तत्वज्ञानाची असे खाण ।।

प्रत्येकाचा धर्म निराळा

जन्मताचि मिळाला ।।

व्यर्थ का भांडता धर्मावरुन

तो तर मिळाला जन्मापासून ।।

भेदभाव जावे विसरुन

त्यातच सर्वांचे कल्याण ।।

स्वधर्म तत्वे पाळा घरांत

बाहेर एक मानवधर्म सर्वांत ।।

मानवधर्म फक्त मानवता

त्यांतची मानवाची श्रेष्ठता ।।

डॉ. भगवान नागापूरकर

९००४०७९८५०

हा चंद्रमा शारदीय पौर्णिमेचा
शीतल चंदेरी प्रीतचांदण्यांचा
साक्ष कोजागरती कोजागरती
स्वर्गीयस्पर्श अश्विनी पौर्णिमेचा ।।१।।

गवाक्षातूनी खुणावतो चंद्रमा
मनआभाळी चांदणे नक्षत्रांचे
धुंद बेधुंद, दरवळते रातराणी
प्रीतगंधाळ तो अवीट सुगंधाचा ।।२।।

तनमनी रमती गतस्मृतींचे रावे
निरवतेत अबोली रात्र धुंदवेडी
बरसते, शुभ्र चंदेरी कोजागिरी
जागर! पुनरुपी प्रीतभावनांचा ।।३।।

दुग्धपान!अमृती मनोमिलनाचे
सौख्यानंदी पुण्यपावन सोहळा
ज्येष्ठत्वाचे हृद्य स्मरण संस्कारी
आदर्श हाच भावनिक परंपरेचा ।।४।।

हा चंद्रमाच,शारदीय पौर्णिमेचा
शीतल शुभ्रचंदेरी प्रीतचांदण्यांचा.....

-- वि.ग.सातपुते.(भावकवी)

9766544908

रचना क्र. १३६

१९ - १० - २०२१.

कीटक ते लहान असूनी
रहात होते फळामध्यें
विश्व तयाचे उंबर फळ
जीवन घालवी आनंदे १

ब्रह्मांडाची त्याची व्याप्ती
उंबराच्या नसे पलिकडे
ज्यासी ते अथांग समजले
बघूनी त्या एका फळाकडे २

माहित नव्हते त्या कीटकाला
झाडावरची अगणित फळे
सृष्टीतील असंख्य झाडे
कशी मग ती त्यास कळे ३

आपण देखील रहात असतो
अशाच एका फळावरी
हीच फळे असंख्य असूनी
असंख्य झाडे विश्वावरी ४

-- डॉ. भगवान नागापूरकर
९००४०७९८५०
bknagapurkar@gmail.com

ओंकारा गणनाथा गजवदन बुद्धिदाता

कपिल अमेया विकट मोरया, तूं जीवनदाता ।।

युगेंयुगें तव सगुणरूप-अवतार एकदंता

युगेंयुगें खल अगणित नाशुन रक्षियलें जगता

युगेंयुगें जनमन, गणराया, स्तवतें तव गाथा ।।

अविरत असते नयनांसन्मुख वक्रतुंडमूर्ती

अविरत जपती हृदय आणि मुख प्रमथनाथकीर्ती

अविरत झुकुनी गजमुखचरणीं नत माझा माथा ।।

जीवन जावें तुझिया पुढती कुसुमें वाहत रे

जीवन जावें तुझिया पुढती नाचत राहत रे

जीवन जावें प्रथमपते तव गुण गातां गातां ।।

जन्मोजन्मीं वसो मनीं विघ्नेश दु:खहर्ता

जन्मोजन्मीं असो पाठिशी दंती सुखकर्ता

जन्मोजन्मीं ठेव गणेशा शिरीं वरदहस्ता ।।

- - -

- सुभाष स. नाईक. Subhash S. Naik
सांताक्रुझ (प), मुंबई. Santacruz (W), Mumbai.
Ph-Res-(022)-26105365. M – 9869002126
eMail : vistainfin@yahoo.co.in
Website : www.subhashsnaik.com / www.snehalatanaik.com

सोडून दे अहंकार तुझा

लाचार आहेस आपल्या परि

पूर्ण जीवन तुला न मिळे

न्यूनता राहते कांहीं तरी...१

धनराशि मोजत असतां

वेळ तुजला मिळत नसे

शरीर संपदा हाती नसूनी

मन सदा विचलित असे...२

शांत झोपला कामगार तो

दगडावरी ठेवूनी डोके

देह सुदृढ असूनी त्याचा

पैशासाठी झुरतां देखे...३

उणीवतेचा कांटा सलूनी

बाधा येत असे आनंदी

म्हणून खरे समाधान ते

लाभत नसते मग कधी...४

-- डॉ. भगवान नागापूरकर

९००४०७९८५०

पहाट झाली,
चिव चिवते चिमणी
उमज येईना,
उठविले तिजला कोणी.....१,

आई आहे कां ?
जी उठवी शाळेसाठी,
गुदगुदल्या करूनी
कुरवाळिते हळूंच पाठी....२,

घड्याळ उठवी
घण घण करूनी नाद
घरट्यामधुनी,
नाही ऐकला असा निनाद.'..३,

' उषाराणी येते,
साऱ्यांची आई बनूनी
प्रेमानें मोडी झोंप,
नाजूक करकमलांनी.....४,

घड्याळ आमचे,
दवबिंदू पडतां पानावरूनी
चाळविती निद्रा,
टपटप आवाज करूनी' .....५

डॉ. भगवान नागापूरकर
९००४०७९८५०

सोडून दे अहंकार तुझा

लाचार आहेस आपल्या परि

पूर्ण जीवन तुला न मिळे

न्यूनता राहते कांहीं तरी...१

धनराशि मोजत असतां

वेळ तुजला मिळत नसे

शरीर संपदा हाती नसूनी

मन सदा विचलित असे...२

शांत झोपला कामगार तो

दगडावरी ठेवूनी डोके

देह सुदृढ असूनी त्याचा

पैशासाठी झुरतां देखे...३

उणीवतेचा कांटा सलूनी

बाधा येत असे आनंदी

म्हणून खरे समाधान ते

लाभत नसते मग कधी...४

-- डॉ. भगवान नागापूरकर
९००४०७९८५०