सुमनांजली या काव्यसंग्रहातून….. 

आपल्या मनीच्या भावनांचा।।
चित्रपट असावा अक्षरांचा।।
शब्दांतुनी तो रेखाटायचा।।
हलाकासा काव्यसडा शिंपायचा

-- सौ.माणिक शूरजोशी

पर्यावरणविषयक लघुकाव्ये….

दोष नव्हता तिचा
अन् वाट ही नव्हती ती चुकली
बदमाशांच्या जाळ्यात
अनाहुतपणे होती फसली

उन्मत्त नशेने माजून
ते सैतान झाले होते
विकृत ओंगळ भावनेला
पूरूषार्थ समजत होते

मनावरच्या आघाताने
जरी नव्हती ती खचली
आत्मसन्मानाची लढाई
जिंकू नव्हती शकली

विधात्यालाही नाही कळले

विकृत हवस ती कसली
नीच त्या नराधमांनी
माणूसकीलाही भोसकली

आंधळ्या त्या न्यायदेवतेला
होते सारे स्पष्ट कळले
अब्रूचे उघडे पंचनामे
तरीही नव्हते टळले

भाग्य होते की दूर्भाग्य
ती एक बातमी होती
वैचारीक उथळपणाला
ती फक्त एक गवसणी होती

हजारो पेटत्या मेणबत्त्या
पाहुन जरी ती सुखावली
काही श्वापदं मोकाट बघून
मनोमनी दुखावली

नराधम फाशी गेले तेंव्हा
किंचीतशी ती हसली
मुक्या निर्भयाच्या शेजारी
गुपचूप जावुन बसली.

- डॉ.सुभाष कटकदौंड

प्रदीप निफाडकरांची गझल

आशीर्वाद दे ग आई मजला, विनवितो मी तुझाच पूत्र ।

बाबा माझे नसती हयात, कोण मजला ह्या जगतात ।।

'केशव' माझे वडील असता, 'केवशसूत' हा ठरतो मी ।

तसाच बनता 'केशवकुमार', मोठे होण्याची युक्ती नामी ।।

जगावयाचे जर मोठ्या नामी, तूच मजला महान आहे ।

'लक्ष्मी' तुझे नाव असता, ‘लक्ष्मीसूत’ होण्यात पाहे ।।

डॉ. भगवान नागापूरकर

संपर्क - ९००४०७९८५०

bknagapurkar@gmail.com

पाण्याच्या बिकट परिस्थितीचे वर्णन करण्याचा एक अपूरा प्रयत्न….

जेंव्हा ठरले गावी जाणे,हूर हूर होती मनी
बराच काळ गेला होता,आयुष्यातील निघुनी

काय तेथे असेल आता,सारे गेले बदलूनी
काळाच्या प्रवाहामध्ये,राहिलं कसे टिकूनी

चकित झालो बघुनी,सारे जेथल्या तेथे
उणीवता न जाणली,क्षणभर देखील मानते

बालपणातील सवंगडी,जमली अवती भवती
गतकाळातील आनंदी क्षण,पुनरपि उजळती

आंबे चिंचा पाडीत होतो,झाडावरती चढुनी
आज मिळाला तोच आनंद,झाडा खालती बसूनी

मळ्यामधली मजा लुटली,नाचूनी गाऊनी
विहिरीमधल्या पाण्यात,मनसोक्त ते डुबूनी

ऐकल्या होत्या कथा परींच्या,तन्मयतेने बसूनी
आज सांगे त्याच कथा मी,काका मुलांचे बनुनी

वाडा सांगे इतिहास सारा,पूर्वज जगले कसे
भव्य खिंडारी उमटले होते,कर्तृत्वाचे ठसे

बापू, आबा, मामा, काका,मामी वाहिनी जमती
कमी न पडली तसूभरही,प्रेमामधली नाती

मीही बदललो, गांवहीं बदलले,काळाच्या ओघांत
आनंद मात्र तो तसाच होता पूर्णेच्या परिसरांत

-- डॉ. भगवान नागापूरकर
९००४०७९८५०
bknagapurkar@gmail.com

मृदंग घुमतो , घुंगुरनादीं वीणेचा झंकार

नगराजावर गणरायाचा विलसे नृत्यविहार ।।

खलनिर्मूलन विघ्ननिवारण पळभर ठेवुन मागे

श्रीगणनायक बह्मांडाचा-पालक नाचूं लागे

पदन्यासातुन युगभाग्या करि जागृत जगताधार ।।

नाचतसे वक्रतुंड , नाचे अंग अंग त्याचें

नाचतात पद, भुजा नाचती , विशाल तन नाचे

नयनांमधुनी उल्हासाचा नर्तन-आविष्कार ।।

सुपासारखे कान नाचती, पुष्ट नाचते सोंड

ओठ नाचती, गाल नाचती, झुलत नाचते दोंद

पीतांबर उत्तरीय गिरक्या घेती गोलाकार ।।

शंख, दंत-क्षत, पाश, गदा, शर, परशू, अंकुश, शूल,

बाहुबंध, मुद्रिका, गळ्यातिल नाचे फूल-न्-फूल

कर्णभूषणें, मेखला नि रक्तिम-रत्नांचा हार ।।

-

वरदहस्त-स्थित लोंबीसह मोदक-पात्रें उदंड

भाळीं गंध नि देहीं चंदन-उटी नाचती थंड

मुगुट नाचतो माथीं, नाचे दाट केशसंभार ।।

भान हरपुनी मग्न नर्तनीं सरस्वतीचा पती

स्वत:स विसरुन नाचत गण, मूषक-वाहन संगती

क्षणाक्षणाला करत अलंकृत नवनव नृत्यप्रकार ।।

नाचत पानें, पुष्प, लता, तृण, तरू, नद्या, निर्झरऽ

भू, सिंधू, पशु-पक्षि मत्स्य , रवि-शशि तारे अंबरऽ

सप्तलोक-दशदिशातुनी ओंकार घेइ आकार ।।

करतो नर्तन गिरिजानंदन सदाशिवाचा पुत्र

पाहत राही जगत् अचंबित, थांबत दिवस नि रात्र

दर्शन अनादि-अनंत यांचें हर्षद अपरंपार ।।

अनुभव असा अलौकिक हा, अस्तित्वच होई झंकृत

जागतसे शब्दांच्याही पलिकडला नाद-अनाहत

नाचे जेव्हां ब्रह्म निर्गुणी, बनुन सगुण-साकार ।।

- - -

नगराज : हिमालय पर्वत

-

- सुभाष स. नाईक. Subhash S. Naik

सांताक्रुझ (प), मुंबई. Santacruz (W), Mumbai.

Ph-Res-(022)-26105365. M – 9869002126

eMail : vistainfin@yahoo.co.in

Website : www.subhashsnaik.com / www.snehalatanaik.com

माझा गं बाळ राजा, पाळणी खेळतसे
पैंजण वाजतसे, त्याच्या पायात छमछमा ।

माझा गं बाळ राजा, घरात रांगतसे
मनगटी रूततसे, त्याच्या हाताला सांभाळा ।

माझा गं बाळ राजा, पाऊल टाकतसे
सोनसरी चमकतसे, त्याच्या गळ्यात चमचमा ।

माझा गं बाळ राजा, दुडूदुडू धावतसे
साखळी रूळतसे, त्याच्या कमरेत रुणझुणा ।

माझा गं बाळ राजा, भुकेचा हळूवार
भरवते खीर, त्याला वाटीत चांदीच्या ।

माझा गं बाळ राजा, निजेचा अल्वार
करू नका गलबला, त्याला जोजवा लवकर ।