नियोजनाच्या लागून मागें, भविष्याची आखतो चौकट
कल्पकतेच्या आहारी जावून, चालण्या विसरे पावूल वाट....१,

अनेक वाटा दिसूनी येती, भविष्यामधळ्या कल्पकतेला
वर्तमान त्या काळाकरिता, जावे लागते एकाच दिशेला...२,

उठूनी करा त्याच क्षणीं ते, वृत्ति असावी अशीच सदा
उद्यांवरती कार्य टाकतां, मनीं उमटती विचार द्विधा...३,

वर्तमान हा निश्चीत असता, यश लाभते अनेकदा
केवळ तुमची बघुनी धडपड, साथ देईल ईश्वर सदा....४

डॉ. भगवान नागापूरकर
९००४०७९८५०
bknagapurkar@gmail.com

भरवशाची घेऊन शिदोरी, पाऊलवाट ती चालत होता
कुणीतरी आहे मार्गदर्शक, ह्यापरी तो अजाण होता

बरसत होती दया त्याची, जात असता एक मार्गानी
आत्मविश्वास डळमळला, बघूनी वाटेमधल्या अडचणी

संशय घेता त्याचे वरती, राग येई त्याच कारणें
विश्वासाला बसतां धक्का, आवडेल कसे त्यास राहणे

ओढून घेई मृत्युचि आपला, अकारण तो त्यास दुरावूनी
जागृत होता पुनरपि विश्वास, संशय जाई दूर पळूनी

-- डॉ. भगवान नागापूरकर
९००४०७९८५०
bknagapurkar@gmail.com

आज हे आकाश मजला,
थोटके का भासते ।
झेप घेण्या पंख फुटतां,
हाती येईल काय ते ?।।१।।

उंच हा गिरीराज देखूनी,
शिखर चढावे वाटते ।
चार पावले टाकतां क्षणी,
चढणे सोपे काय ते ? ।।२।।

अथांग सागर खोल जरी ,
डूबकी घ्यावी वाटते ।
जलतरण कला अवगत होता,
सूर मारणें जमेल कां ते? ।।३।।

काव्य सरिता वाहत आहे,
ज्ञान गंगोत्री भासते ।
केवळ कविता चार रचूनी,
त्यात डुबणे शक्य कां ते? ।।४।।

डॉ. भगवान नागापूरकर
९००४०७९८५०
bknagapurkar@gmail.com

दवाचा शिंपीत सडा,
पहाट उमलत आली,
खेळ संपता तमाचा
पृथ्वीवर बागडू लागली,--!!!

पाने सारी भिजता,
झाडांना निराळी टवटवी,
रंग उठून दिसता,
वाटते विलक्षण तरतरी,--!!!

रस्ते थोडे भिजता,
अवनीला येई तरारी,
येऊ घातला भास्करराजा,
आंस तिच्या किती उरी,--!!!

भिजत्या भिजत्या पाकळ्या, थेंबांचे डंवरती मोती,
रंगीबेरंगी नाना फुलांना,
कसा मस्त उठाव देती,--!!!

पाकळी - पाकळी फुलता, कळीकळी ओलावली,
ऐट दाखवत पहा जगा,
कशी पानाआड मुसमुसली,--!!!

पहाटे संगे भणाणे वारा,
थंडी कशी गुलाबी,
रंग घेत उषेचा सारा,
पहाट मनसोक्त नाचली,--!!!

किरणांची आता किमया,
वसुंधरा तेजाळू लागली, अंधाराच्याच मुशीतुनी,
सोनेरी सकाळ उगवली,--!!!

©️ हिमगौरी कर्वे.

अतूट मैत्रीचे बंध
मनाचे धागे जुळताना..
मनमोकळ्या जीवांचे
मैत्रसौख्य फुलताना..

श्वासा समिप मैत्री
काळजात जपताना..
मैत्रीची हाक येताच
धावत जाताना..

आशा निराशेच्या
वादळी हरवताना..
मैत्रीनेच सावरले
जीवन जगताना...

सुवर्ण कोंदणात
हिरे जडवताना..
आयुष्य सुदर ते
मैत्री निभवताना.

पहाटेच्या प्रसन्नमयी वातावरणात
चालताना तुझ्याशी घट्ट नातं जाणवतं..
तळ्याकाठीची ओल्या स्पर्शाची तुझी माया..
कितीतरी वेळ थिजून ठेवते...
आठवणीतल्या वाटेवर तू घेऊन जातेस अलगद..
बालपणी तुझ्याबरोबर तासनतास घालवलेला वेळ..
बोटा बोटात तुझं रूतून बसणं..
घरातल्यांच्या धाकाने तेच हात सदऱ्याला पुसणं..
कधी सगळ्या अंगभर तूच आणि मी पटांगणात खेळायचो..
तू पोटात बीज रूजवतेस म्हणून आम्ही भाकरी खातो..
म्हणून पहिल्या पावसाचा मनात अजून मृदूगंध वाहतो..
तू बोलावलेस म्हणून आपल्या माणसात येतो..
तू खरच फार मोलाची आहेस..
वीतभर का होईना पण आपल्या पायाखालची जमीन
आपलं अस्तित्व दाखवते..
तू फार खोलवर गेलेली.. मूळ जननी..

मातेच्या उदरात जन्माला येईल तो शेवटी तुझ्या उदरात
मिसळून जाईल..
हा नश्वर देह गळून पडला की गती मिळण्यासाठी माती
द्यायला येतील ती आपल्या मातीतील माणसं..
ॠणानुबंध मातीशी
शतदा घडावे..
मातीत मिसळून
जीवन कृतार्थ व्हावे..

प्रतिभा चौगले यांच्या प्रतिभास या कवितासंग्रहाच्या इ-पुस्तकातील ही कविता.
हे इ-पुस्तक आपण खालील लिंकवर खरेदी करु शकता.

किंमत : रु.८०/-
सवलत किंमत : रु.५०/-

https://marathibooks.com/books/pratibhas-by-pratibha-chougale/

इकडं आड अन् तिकडं विहीर
इकडं सासूबाई अन् तिकडं वसंतरावांची घाई

स्वयंपाकघरात सासूबाई दिवाणाखान्यात मामंजी
दाराच्या फटीतून वसंतराव करतात अजीजी!

कडक इस्त्रीची पँट चकचकीत बूट
त्यावर रुबाबदार शर्ट आणि टाय
कामावर निघाले वसंतराव
परतले का बरं? विसरले काय?

पोळीभाजीचा डबा बिसलेरीची बाटली
आणि रेल्वेचा पास
बॅगेत भरुन निघाले वसंतराव
लांबून करतात किस पास!

लग्नात देऊन जिलेबीचा घास
उखाणा घेतात म्हणे लाजून खास
वसंतरावांना आहे जिलबीचं वावडं
म्हणून भरवते त्यांना वालाचं बिरडं!

उखाणा घ्यायला
मी काय आहे जूनी काकूबाई?
आधुनिक वसंताशी
म्हणूनच दिलजमाई!

जावई रुसला मारुतीसाठी अडला
वसंतराव नाहीत बरे का तसे
त्यांच्या मनात ह्युंदाईच बसे!

-- विनायक अत्रे.

का असा धांवतोस तूं ,
नशिबाच्या मागें मागें,
यत्न होता भगिरथी,
नशीब येईल संगे ।।१।।

प्रयत्न होतां जोमाने,
दिशा दिसताती तेथें,
यशाचे ध्येय सदैव,
योग्य मार्गानें मिळते ।।२।।

प्रयत्न करूनी बघा,
ईश्वर देखील मिळेल,
इच्छा शक्ती प्रभावानें,
नशीबही बदलेल ।।३।।

डॉ. भगवान नागापूरकर
९००४०७९८५०
bknagapurkar@gmail.com