पुढे पडणाऱ्या प्रत्येक पावलाला एक लयबद्ध ताल आहे
जाणिवेच्या तेवत्या ज्योतीला भावनेचं संतत तेल आहे
जीवनाच्या अभंगाला, मनाच्या मृदुंगाला आईचा स्पर्श आहे

हरएक श्वासात, प्रत्येक निश्वासात आईचा आभास आहे
मनाच्या पापुद्रयांना जपणारा नितांत विश्वास आहे
हृदयाच्या स्पंदनांना, काळजाच्या वेदनांना, आईचा स्पर्श आहे.

आयुष्याच्या विवंचनांची, विटंबनांची, कुचंबणांची चढाओढ आहे
निर्ढावलेल्या पाषाणशिळांना उद्धाराची आतुर ओढ आहे
आश्वस्त मनांना, जीवनाच्या कणाकणांना आईचा स्पर्श आहे

आईच्या बोटाने आखलेली आयुष्याची दिशा आहे
आधारवडाच्या पारंब्यांना नित पालवणारी आशा आहे
जीवनाच्या पतंगाला, दिशाबद्ध विहंगाला आईचा स्पर्श आहे

हर आव्हानाला भिडण्याची, जिंकण्याची पैजा, आस दुर्धर आहे
विजयी उन्मादपण नि पराभूत मन सामावणारे मायेचे पदर आहेत
खदखदत्या हास्यांना, गदगदत्या हुंदक्यांना आईचा स्पर्श आहे

भावविश्वांना पेलणारे, हलतेझुलते असंख्य पूल आहेत
गर्भारमातीत फोफावणारी मनोरम स्वप्नांची हूल आहे
भावनांच्या कढांना, घशातल्या आवंढ्यांना आईचा स्पर्श आहे

काचेच्या देव्हाऱ्यात जतन जीवनमूल्यांचं जीवापाड आहे
महत्वाकांक्षेला बांध आहे सत्याचा नि न्यायाचीही चाड आहे
आमच्या आयुष्याला, मानवी अस्तित्वाला आईचा स्पर्श आहे.

-यतीन सामंत

घरें निरनिराळी बांधली, घ्याहो निरखूनी ।।धृ।।

वास्तुकला सुंदर रंग त्याचे बहारदार

आकर्षक वाटणार परी निवड करा जपुनी,

घ्याहो निरखूनी ।।१।।

ही घरे भावनांची त्यांत छटा विचारांची

भर पडतां श्रद्धेची जीवन जाईल तसेंच होऊनी,

घ्याहो निरखूनी ।।२।।

राग लोभ अहंकार मद मत्सर हे विकार

ह्यांची ती घरे असणार शोधा विचार करुनी,

घ्याहो निरखूनी ।।३।।

दया क्षमा शांति प्रेम आनंद उल्हासती

आदर भावांची वसती विवेक बुद्धीने शोधा जाणूनी,

घ्याहो निरखूनी ।।४।।

प्रत्येक शोधतो आपले घर तसेच करी जीवन साकार

सुख दुःखाची फळे घेणार हीच जीवनाची खरी कहाणी,

घ्याहो निरखूनी ।।५।।

घरें बांधली निरनीराळी घ्याहो निरखूनी

-- डॉ. भगवान नागापूरकर
९००४०७९८५०
e-mail- bknagapurkar@gmail.com

खरेदी केला सुंदर पक्षी, दाम देवूनी योग्य असे ते ।
नक्षीदार पिंजरा घेवूनी, शोभिवान केले घरातें ।।
प्रात:काळी उठोनी बघतां, चकित होवूनी गेलो मनीं ।
पक्षानें मान टाकली, पडला होता तळात मरूनी ।।
क्षणभर मनी खंत वाटली, राग आला स्वकृत्याचा ।
अकारण हौस म्हणूनी, खरेदी केला पक्षी याचा ।।
किती बरे निच मन हे निराशा तयाला धन हानीची ।
पक्षानेतर प्राण गमविला, विषण्णता परि दुय्यम याची ।।

डॉ. भगवान नागापूरकर

संपर्क - ९००४०७९८५०

bknagapurkar@gmail.com

तो क्षण फार मस्त असतो
जेंव्हा चहा उकळत असतो
सुगंध सार्‍या घरभर पसरतो
किचनमधून कपबशांचा आवाज येतो

अमृतरुपी चहाला कधी स्वाद आल्याचा
गवतीचहा कधी, तर कधी सुगंध वेलचीचा
तुलसीचहा मसालाचहा - रंग नाना रुपांचा
उत्तेजित करे,क्षमता वाढवे-आनंद देई जीवनाचा

मग चहा संगे बिस्कीटे येती
कुणी पोहे त्यात बुडवून खाती
तर कुणी गरमागरम भुरके मारुन पिती
बशीत ओतून पिणारे पण असती

मित्रांची मैफिल चहाविना नाही
पाहुण्यांचे स्वागत त्याच्याशिवाय नाही
आस्वाद घ्यावा कधीही,वेळेचे बंधन नाही
दुःख असो,आनंद असो,चहासारखी साथ नाही

श्री सुनील देसाई
२२/०५/२०२२

तुझेच घेऊनी तुलाच द्यावे, भासते ही रीत आगळी
उमजत नाही काय करावे, तुझीच असतां सृष्टी सगळी

वाहणाऱ्या संथ नदीतील, पाणी घेऊन अर्घ्य देतो
सुंदर फुले निसर्गातील, गोळा करुन चरणी अर्पितो

अन्न ग्रहण करण्यापूर्वी, नैवेद्य तुजला दाखवितो
जगण्याचा तो मार्ग दोखवी, ह्याचीच पोंच आम्ही देतो

विचार ठेवूनी पदोपदीं, साऱ्यांचा तूं असशी मालक
दुजास देण्यातील आनंद, हाच मिळवित असे एक

डॉ. भगवान नागापूरकर
९००४०७९८५०

अकारण कां नांवे ठेवता सदैव कैकयीला ।
चित्त देवूनी समजूनी घ्या तुम्ही राजमातेला ।।धृ।।

जेव्हां दशरथ युद्धास जाई ।
कैकयी त्याच्या सेवेत राही ।।
राजनीति अन् युद्धनीति ही ।
अवगत झाली सारी तिजला ।।१।।

चित्त देवूनी समजूनी घ्या तुम्हीं राजमातेला

नजीकच्या त्या देशामधूनी ।
रावणादी असुरी शक्ती वाढूनी ।।
सामान्य जनाला जर्जर करुनी ।
हा हाः कार तो माजविला ।।२।।

चित्त देवूनी समजूनी घ्या तुम्हीं राजमातेला

परिस्थितीला जाणून घेतां ।
केवळ चौदा वर्षाकरीता ।।
राम वनी तो पाठवी माता ।
तोड नसे त्या दूरदृष्टीला ।।३।।

चित्त देवूनी समजूनी घ्या तुम्हीं राजमातेला

माता आणि राजधुरंदर ।
दुहेरी भूमिका ही शिरावर ।।
निर्णय घेऊनी अतिशय खडतर ।
इतिहास जिने घडविला ।।४।।

चित्त देवूनी समजूनी घ्या तुम्ही राजमातेला

रावणवृत्ती महा असूरी ।
नष्ट केली तिनेच खरी ।।
मार्ग निवडले जरी कांटेरी ।
यशस्वी केले रामप्रभुला ।।५।।

चित्त देवूनी समजूनी घ्या तुम्ही राजमातेला

धाडीला नसतां राम वनीं ।
मारीला असता रावण कुणी ?
स्वतःचे शिरीं कलंक घेवूनी ।।
धरणीवरचा पाप भार रोकला ।।६।।

चित्त देवूनी समजूनी घ्या तुम्ही राजमातेला

-- डॉ. भगवान नागापूरकर
९००४०७९८५०

गझल

वृत्त :- व्योमगंगा

लाच घेणे पाप आहे सांगणारे पाहिले मी
वाट सत्याची धरूनी चालणारे पाहिले मी

झोपडी माझी सुखाची खाण व्हावी वाटते मज ;
गर्व मोठ्या बंगल्याचा मानणारे पाहिले मी

फाटका माझा खिसा पण दान देणे जाणतो मी
पावत्या छापून खोट्या मागणारे पाहिले मी

लोकशाही श्रेष्ठ आहे हेच लोका सांगती ते
लोकनेते साफ खोटे बोलणारे पाहिले मी

वाचवावी लेक, मित्रा फार झाले बोलणे हे
वारसासाठी सुनेला जाळणारे पाहिले मी

© जयवंत वानखडे,कोरपना
भ्रमणध्वनी ९८२३६४५६५५

सतत नाम घेण्यासाठीं, बुद्धी दे रे मजला,
आठवण तुझी ठेवण्याची, वृत्ती दे रे मनाला ।।धृ।।
श्वासात प्राण म्हणूनी, अस्तित्व तुझेच जाणी,
श्वास घेण्याची शक्ती, तुझ्याचमुळे असती,
जीवनातील चैतन्य, तुजमुळेच मिळते सर्वांना ।।१।।
सतत नाम घेण्यासाठी बुद्धी दे रे मजला,

अन्नामधले जीवन सत्व, तूच ते महान तत्व,
सुंदर अशी सृष्टी, बघण्या ते दिली दृष्टी,
आस्वाद घेण्या जगताचा, जागृत ठेवी भावनेला ।।२।।
सतत नाम घेण्यासाठी, बुद्धी दे रे मजला

निनादाच्या लहरी, तन्मयतेने श्रवण करी,
आभार मान्यता मति, परि शब्दही कमी पडती,
जगणेच कठीण वाटते, क्षणभर तुजविण कुणाला ।।३।।
सतत नाम घेण्यासाठी बुद्धी दे रे मजला

जाणून तव उपकार, मानावे सदैव आभार,
ही भावना येते मनी, जावे तुझ्यात समावूनी,
रोम रोमातूनी माझ्या, नामाच्या दे गतिला ।।४।।
सतत नाम घेण्यासाठी बुद्धी दे रे मजला

डॉ. भगवान नागापूरकर
संपर्क - ९००४०७९८५०
bknagapurkar@gmail.com

तूच माझी राधिका,
तूच माझी प्रेमिका,
मोहिनी माझी तू ,
तूच माझी सारिका, --!!!

मुसमुसते प्रेम तू ,
सौंदर्य ओसंडून वाहे,
मदनाची रती तू ,
भित्र्या डोळ्यांनीच पाहे ,--!!!

कमनीय सिंहकटी तुझी,
बाहूत माझ्या सामावे,
लाल कोवळे ओष्ठद्वज,
डाळिंबीची जणू फुले,--!!!

मोहक बांधा तुझा,
जाता-येता खुणावे ,
कुंतलाचे मानेवर ओझे,
पाठीवरचा तीळ झाके, --!!!

आरस्पानी रंग-गोरा,
काळजां घायाळ करतो,
गोड गुलाबी कायेवर,
लज्जेचा गेंदा फुलतो,--!!!

मिटून घेशी शृंगारात,
संकोची तू कासवी,
मदनाची बाधा होता,
फुलून येते रातराणी,--!!!

*ऐहिक तू भोगिनी,
मजसाठी मात्र योगिनी,
भोग--योगाच्या संयोगी,
अलौकिक तू कामिनी*,--!!!

हिमगौरी कर्वे.©