डोक्यावरी घिरट्या घालीत, काळ सदा फिरतो
वेळ साधतां योग्य अशी ती, त्वरित झेपावतो...१

भरले आहे जीवन सारे, संकटांनी परिपूर्ण
घटना घडूनी अघटीत, होऊन जाते चूर्ण...२

फुलांमधला रस शोषतां, फूल पाखरू नाचते
झाडावरती सरडा बसला, जाण त्यास नसते...३

आनंदाच्या जल्लोशात कुणी, चालले सहलीला
अपघात घडतां उंचावरी, नष्ट करे सर्वाला...४

खेळी मेळीच्या वातावरणी, हसत गात नाचते
ठसका लागून कांहीं वेळी, हृदय बंद पडते...५,

सतत जागृत असता तुम्हीं, टाळता येई वेळ
सावध तुमचे चित्त बघूनी, निघून जाई काळ ...६

डॉ. भगवान नागापूरकर
९००४०७९८५०

“सुमनांजली” या काव्यसंग्रहातून…

आत्मविश्वास जागृत ठेवूनी, कार्य घेवूनी तडीस नेती ।

कधीही न राही अवलंबूनी, मदतीसाठी दूजा वरती ।।

ईश्वर करीतो मदत तयांना, मदत करी जे आपले आपण ।

आपल्यातची तो ईश्वर आहे, असते याची जयास जाण ।।

विश्वासाने हुरूप येई, जागृत करीती अंतर चेतना ।

लक्ष्य सारे केंद्रीत होता, यश चमकते प्रयत्नांना ।।

-- डॉ. भगवान नागापूरकर

९००४०७९८५०

दिन दुबळे रोगी जर्जर, कितीक पसरले या संसारी

काटे काढूनी जीवनावरचे, सुगंध घ्या तुम्ही कुणीतरी....१

शून्यामधले कितीकजण ते, शून्यची सारे अवतीभवती

परिस्थितीच्या वणव्यामध्ये, धगधगणारे जीवन कंठती....२

आज हवे ते त्यांना कुणीतरी, फुंकार घालील दु:खावरती

सहानुभूतीचा शब्द एक तो, निर्माण करील सहनशक्ति....३

क्षीण होता तव दृष्टी, दिसेल कां तयाची धडपड

श्रवणदोष तो येण्यापूर्वी, ऐकून घे तू दु:खी ओरड...४

चपळ सारे अवयव असता, धावपळीचे जीवन बघ तू

संगे जावून जाण तयांचा, जगण्यामधला खडतर हेतू...५

जेव्हां असशील विंवचनात तू, लक्ष केंद्रीत स्वदेहा भवती

कोण जगतो कसा काय ते, जाणून घेण्या सवड कुणा ती...६

डॉ. भगवान नागापूरकर

९००४०७९८५०

e-mail- bknagapurkar@gmail.com

तपसाधना करूनी मिळवी, सत्वगुणाची शक्ती अंगी ।

त्याच शक्तीच्या जोरावरती, स्थान लाभे त्यांना स्वर्गी ।।

शक्ती ऱ्हास जे करिती त्याचा, सारे सुख आणि भोग भोंवतीं ।

परिणामी तो फेकला जाऊनी, पुनरपी येई याच भूवरती ।।

एक दया दाखवी ईश्वर, वातावरणी देऊनी संधी ।

जन्म मिळे ते त्याच ठिकाणी, कमविले पुण्य ज्याने आधी ।।

चक्र खेळ हा चाले सदैव, स्वर्ग मृत्यू या लोकी त्याचा ।

अंतिम ध्येय तेच ठरते, मिळविणे क्षण तो मुक्तीचा ।।

डॉ. भगवान नागापूरकर

९००४०७९८५०

तप्त होतां धरणी माता,
शांत करी वर्षा तिजला
प्रफुल्लतेचे झरे फुटती,
आंतूनी त्या मातीला.....१,

जलमय होती नदी नाले,
दुथडी भरूनी वाहती
धबधब्यातील खरी शोभा,
वर्षामुळेंच दिसती...२,

हिरव्या रंगीं शाल पसरते,
धरणी माते वरी
ऊब यावी म्हणून मेघांचे,
आच्छादन ती करी....३,

वर्षा धरती बहिणी असूनी,
प्रभूची भावंडे
उचंबळूनी प्रेम येतां,
धावून येते तिजकडे....४

डॉ. भगवान नागापूरकर
संपर्क - ९००४०७९८५०
bknagapurkar@gmail.com

लाभले असता सर्व काही..
त्याची कधी मोजदाद केली नाही..
जे थोडेसे काही मिळाले नाही..
त्याची मात्र मोजणी थांबली नाही..।।..१

मन मोकळे कधी ठेवले नाही..
फक्त स्वानंदात रमलो..
मी , फक्त मीच एकटा सर्वज्ञ..
हा अहंकार कधी सोडला नाही..।।..२

काय म्हणावे अशा प्रवृत्तीला ?..
अरे झाडा सारखे जीवन असावे..
जे जे आहे , ते ते सर्व देत रहावे..
सर्वांती उमजावे , इथे आपुले काही नाही..।।..३

©️वि.ग.सातपुते.( भावकवी)

9766544908

रचना क्र.५२ / ६-४-२०२१.

दसरा सण आनंदाचा
सोनं द्या प्रेमाचं मोठं
देऊन पानं आपट्याची
नका देऊ सोनं खोटं

हे भूत संशयाचे छळते कसे मनाला ।

करीते सदा परि ते दिशाहीन विचारमाला ।।

एकाग्रतेचा घात होई क्षणार्धात तेथे ।

डोलायमान होऊनी स्थिती बदलून जाते ।।

गमवी विश्वास जेव्हां प्रभू अस्तित्व शक्तीचा ।

कळला न अर्थ त्याला या सत्य जीवनाचा ।।

येता मनी संशय आपलाच ज्या घडीला ।

शोकांतिका जीवनाची ठरे त्याच क्षणाला ।।

-- डॉ. भगवान नागापूरकर
९००४०७९८५०

इकडं आड अन् तिकडं विहीर
इकडं सासूबाई अन् तिकडं वसंतरावांची घाई

स्वयंपाकघरात सासूबाई दिवाणाखान्यात मामंजी
दाराच्या फटीतून वसंतराव करतात अजीजी!

कडक इस्त्रीची पँट चकचकीत बूट
त्यावर रुबाबदार शर्ट आणि टाय
कामावर निघाले वसंतराव
परतले का बरं? विसरले काय?

पोळीभाजीचा डबा बिसलेरीची बाटली
आणि रेल्वेचा पास
बॅगेत भरुन निघाले वसंतराव
लांबून करतात किस पास!

लग्नात देऊन जिलेबीचा घास
उखाणा घेतात म्हणे लाजून खास
वसंतरावांना आहे जिलबीचं वावडं
म्हणून भरवते त्यांना वालाचं बिरडं!

उखाणा घ्यायला
मी काय आहे जूनी काकूबाई?
आधुनिक वसंताशी
म्हणूनच दिलजमाई!

जावई रुसला मारुतीसाठी अडला
वसंतराव नाहीत बरे का तसे
त्यांच्या मनात ह्युंदाईच बसे!

-- विनायक अत्रे.