हरि हराचे पुजन करतो ।

दृष्य दिसे बहुत आगळे ।।

प्रभूकडूनी प्रभूची सेवा ।

सर्वजणां ही किमया न कळे ।।

शिवलिंगापुढती ध्यान लावी ।

डोळे मिटूनी प्रभू श्रीराम ।।

सुंदर सुबक चित्रामध्ये ।

व्यक्त होई ह्रदयातील प्रेम ।।

श्रीराम प्रभूच्या पूजेवेळीं ।

आत्मरुप उजळून आले ।।

शिवलिंगातील रामस्वरुप ।

एक होऊनी मग गेले ।।

कोण भक्त आणि ईश्वर कोण ? ।

भासे मनी हे अवघड कोडे ।।

परम बिंदूवर भक्ती असता ।

ईश्वर भक्त दूजा न सांपडे ।।

डॉ. भगवान नागापूरकर

९००४०७९८५०

येरे मना, येरे मना
नको जावू दूर, दूर, दूर
येथे नाही रे आता
जीवाला हुर, हुर, हुर.....।।धृ।।

सोडूनी दे रे, ते तुझे
नवे, नवे बहाणे
सोडूनी दे रे ते तुझे
आज इथे अन उद्या तिथे
झुळझुळणाऱ्या वारुसंगे
नकोस उधळू दूर, दूर, दूर....।।१।।

चल पाहू या रे
विवेकी सुंदर गांव
चल घेवूया या रे
शांती सुखाचा श्वास
करू निर्धारी ते
दुःख पहाडी दूर, दूर, दूर....।।२।।

येईल रे येथे सारे
मंगलतेचे वारे
असेल येथे सारे
स्वर्गसुख ते सारे
सोडूनी ये सत्वर
स्वार्थ तुझा दूर, दूर, दूर....।।३।।

-- वि.ग.सातपुते (भावकवी)

9766544908

रचना क्र. २७९

१/११/२०२२

चष्मा लावूनी करीत होतां,
ज्ञानेश्वरीतील पारायण,
दृष्टीमधले दोष काढले,
चाळशीचा आधार घेवून ।।१।।

फुटूनी गेला एके दिवशीं,
चष्मा त्याच्या हातामधूनी,
पारायणे ती बंद पडली,
दृष्टीस त्याच्या बाध येऊनी ।।२।।

चालत असता सरळपणे,
दैनंदिनीचे कार्यक्रम,
खीळ पाडूनी बंद पाडी,
क्षुल्लक वस्तू क्षुल्लक दाम ।।३।।

वस्तूचे मूल्य ठरते,
तिच्या उपयोगिते वरती,
तोलण्यास धन न लागे,
मूल्य मापन जेंव्हां होती ।।४।।

डॉ. भगवान नागापूरकर
संपर्क - ९००४०७९८५०
bknagapurkar@gmail.com

करूं म्हटले करूं न शकलो रोकू म्हटले रोकू न शकलो

जे जे स्फूरले येईल ते ते ठरले असते होईल ते ते

बघूनी बाह्य जगला ठरवी मिळवीन तेच सुख भावी

त्याचेसाठी स्थिती आगळी उमज न येई ती सगळी

धडपड करीतो गडबड करीतो त्याच चाकोरीतूनी जाऊ लागतो

सुप्त गुण हे अंगी लपले उभारून ते येतील सगळे

मात करूनी विचारावरती सुप्त गुण हे विजयी होती

गुणधर्म ही ईश्वरी योजना घडते तेच म्हणूनी क्षणाक्षणा

-- डॉ. भगवान नागापूरकर

९००४०७९८५०

आत्म्याला ओढ असते ईश्वराच्या मिलनाची
जाण सदेव राहते प्रभुमय स्वरुपाची ।।१।।

अंशात्मक भाग असे आत्मा हा परमात्म्याचा
उत्कंठ ते आकर्षण गुणस्वभाव तो त्याचा ।।२।।

आत्म्यास पडले असे बंधन ते शरीराचे
जीवन कार्ये करुनी प्रयत्न करी मुक्तीचे ।।३।।

मुक्त होई त्या क्षणीं अनंतात सामवतो
परमेश्वरि रुपांत विलीन होऊन जातो ।।४।।

आत्मा मुक्त होत असे देहकर्म फळावर
चांगले कर्म नसता नविन देह घेणार ।।५।।

दोन प्रकारांनी आत्मा प्रभू समर्पण होतो
देह मृत वा सजीव असतांना हे साधतो ।।६।।

ध्यान साधना करणारे उतरती समाधीत
त्याच क्षणी शरिराला आत्मा असे सोडित ।।७।।

देह सोडूनी भुवरी आत्मा येई बाहेरी
क्षणिक काळा करितां मीलन होई ईश्वरी ।।८।।

समाधी असे साधन प्रभु मिलन होण्याचे
देह समाधीत जाणें सार असते जिवनाचे ।।९।।

जीवंतपणीच तुम्हीं प्रभुमय होत असे
आनंदी नितांत क्षण खराखुरा तोच असे ।।१०।।

आत्म चिंतन करुनी आत्म ज्ञान प्राप्त होई
तोच ईश्वर असूनी दुजा ठिकाणीं तो नाहीं ।।११।।

डॉ. भगवान नागापूरकर
९००४०७९८५०

तुझे नी माझे कसले नाते
अजून मला ते कळले नाही
एकदा तरी तुज पाहिल्यावीना
मजला काही करमत नाही ।
ऊजाडताच दिवस नवीन
रोज नव्याने तुला पाहतो
रम्य त्या गत आठवणीने
का पुन्हा रोमांचित होतो ।
आता तरी तू सांग मजला
काय आहे आपुले नाते
का आजही तव आठवणीने
मन माझे ग मोहीत होते ।

सुरेश काळे
मो. 9860307752
सातारा.
दि. ३ आक्टोंबर २०१८

उगवत्या सूर्याच्या कुशीत,
नवं वर्ष अलगद जागं होतं।
मनाच्या शांत अंगणात,
आशेचं एक फुल उमलतं॥

दारी उभी गुढी निरभ्र,
आकाशाशी बोलत राहते।
"जगणं म्हणजे पुढे जाणं",
हळुवार सांगत राहते॥

कडू-गोड त्या नीम-गुळात,
जीवनाचं गूढ दडलंय।
हसत-रडत, पडत-उठत,
सुखाचं बीज रुजलेलंय॥

वाऱ्यावरती सणाची चाहूल,
घराघरात शांत आनंद।
साध्या क्षणातही सापडतो,
मनात दरवळणारा सुगंध॥

गुढीपाडवा म्हणजे फक्त सण नाही,
तो मनाचा एक नवा श्वास आहे |
जुनं सगळं मागे सोडून,
नव्यानं जगण्याचा विश्वास आहे ||

•ॲड.कीर्तिराज शैलेंद्र आगलावे, पुणे ✨
मो:- 9011841212

खर्च करावी ऊर्जा आपली, योग्य कामांकरीता,
शक्तीस द्यावी दिशा चांगली, जीवन यशाकरीता ।।धृ।।

बागेतील फुले सुंदर,
फुलपाखरांचे रंग बहारदार,
मोहक इंद्र धनुष्याकार,
निसर्गातील रम्यतेमध्यें शोधा, ईश्वरी गुणवत्ता,
खर्च करावी ऊर्जा आपली, योग्य कामांकरीता ।।१।।

भजन पूजन प्रभूचे,
भक्ति-भाव मनाचे,
उपवास करी देहशुद्धीचे,
तपसत्वाच्या शक्तीनें करा, आत्म्याची मुक्तता ,
खर्च करावी ऊर्जा आपली, योग्य कामांकरिता ।।२।।

गरिबासी मदतीचा भाव,
दुःखितांसाठीं प्रेमळ स्वभाव,
घ्या इतरांच्या मनाचे ठाव,
मिळवा कल्याण करुनी, त्यांच्यात समाधानता,
खर्च करावी ऊर्जा आपली, योग्य कामांकरिता ।।३।।

धनसंपत्ती गंगाजळ,
मोहमोयांचे जाळ,
षड्-रिपू विकार सकळ,
विवेक बुद्धीने नष्ट करा, ही मनाची मलिनता,
खर्च करावी ऊर्जा आपली योग्य कामांकरिता ।।४।।

सर्वत्र आहे प्रभू संचार,
अणूरेणूत झाला साकार,
ब्रह्मांडही त्याचा आकार,
विलीन व्हा ईश्वरी तत्वांत, त्यास सर्व अर्पिता,
खर्च करावी ऊर्जा आपली, योग्य कामांकरिता ।।५।।

डॉ. भगवान नागापूरकर
संपर्क - ९००४०७९८५०
bknagapurkar@gmail.com

अशी कशी लेक देवा,
माझ्या पोटी येते
नाव सुद्धा माझं ती
इथेच ठेऊन जाते।।

पहिला घास देवा ती
माझ्या कडून खाते
माझाच हात धरुन ती
पहिलं पाऊल टाकते।।

माझ्याकडूनच ती
पहिलं अक्षर शिकते
तिच्यासाठी सुद्धा मी
रात्र रात्र जागतो।।

कुशीत माझ्या झोपण्यासाठी
गाल फुगवुन बसते....
मी आणलेला फ्रॉक घालून
घर भर नाचते।।

अशी कशी लेक देवा,
माझ्या पोटी येते
असे कसे वेगळे हे
तिचे माझे नाते।।

एक दिवस अचानक.. ती
मोठी होऊन जाते
बाबा, तूम्ही दमला का ?
हळूच मला विचारते॥

माझ्या साठी कपडे, चप्पल,
खाऊ घेऊन येते......
नव्या जगातील नविन गोष्टी
मलाच ती शिकवते।।

तिच्या दूर जाण्याने
कातर मी होतो
हळूच हसून मला ती
कुशीत घेऊन बसते।।

कळत नाही मला देवा,
असे कसे होते
कधी जागा बदलून ती
माझीच आई होते।।

देव म्हणाला, ऐक पोरा..
तुझे तिचे नाते
विश्वाच्या साखळीची
एक कडी असते।।

तुझ्या दारी फुलण्यासाठी
हे रोप दिलेले असते...
एक दिवस दुस-याच्या
घराची शोभा व्हायचे असते...
सावली आणि सुगंधाशी तर
तुझेच नाते असते।।

वाहत्या प्रवाहाला कोणी,
मुठीत कधी का धरते ?
मार्ग आहे ज्याचा, त्याचा
पुढेच असते जायचे।।

तुझ्या अंगणातली धारा ही
"जीवनदात्री" होते
आणि वाहती राहण्यासाठीच
"गंगा" ''सागराला" मिळते।।

एक तरी मुलगी असावी
उमलताना बघावी
नाजूक नखरे करताना
न्याहाळायला मिळावी

एक तरी मुलगी असावी
साजिरी गोजिरी दिसावी
नाना मागण्या पुरवताना
तारांबळ माझी उडावी

एक तरी मुलगी असावी
मॅचींग करताना बघावी
नटता नटता आईला तिने
नात्यातली गंमत शिकवावी

एक तरी मुलगी असावी
जवळ येऊन बसावी
मनातली गुपिते तिने
हळूच कानात सांगावी

एक तरी मुलगी असावी
गालातल्या गालात हसावी
कधीतरी भावनेच्या भरात
गळ्यात मिठी मारावी......!

एक तरी मुलगी असावी
एक तरी मुलगी असावी

-- श्रीकांत पोहनकर

नादावले सखीने
मन जडल्या नात्याचे
चंद्र पाकळ्यांची बरसात
फुलणार मग निशेने
भिजशिल गं प्रेमाने
सखी कोणता ऋतुमास
ओठावरी तुझा ध्यास
मन करुन वारुचे
ये प्रणयसखे वेगाने
भिजशिल गं प्रेमाने
भेटशील ना त्या ठिकाणी
दुसरे नसेल कोणी
क्षण तुझ्या भेटीचे
ये करुनि बहाणे
भिजशील गं प्रेमाने

-सौरभ दिघे