काय म्हणावे स्त्रिला, जादूगार कि किमयागार?
कि आयुष्याच्या रंगभूमिची, चतुरस्त्र कलाकार?

दुर्गा-काली, लक्ष्मी-सरस्वती, रुपे तिची चार
अष्टावधानी चित्ताची ती एक चतूर नार |

ध्यास घेऊनी धैर्यानी ती, लढा देते सार्थ,
तिच्या अंगी करारीपण अन, निर्णयाचे सामर्थ्य |

"झांशिची राणी", "जिजाऊ" ह्या तर, मूर्तिमंत आदर्श
सावित्रीबाई - रमाबाईचे स्तिमित करते कार्य |

जीवन देऊनी जगणे तुमचे, नारी करते कृतार्थ
तिच्याविना घरपणच काय, सारीच नाती व्यर्थ |

कोमल भाऊक मनी तिच्या, कमालिची सोशिकता
दुसरा जीव वाढवण्याची, उदरी देखील क्षमा |

जीवासाठी त्या, तिच्या ह्रदयी, वात्सल्याचा झरा
कुणी न विसरे बुरुजावरुनी, उडी घेणारी "हिरा" |

विविध क्षेत्री आजही "स्त्रिची"
जिद्द धडाडी, योग्यता
"तिच्यासारखी तिच" खरोखर
जाणून आहे विधाता
हे जाणून आहे विधाता |

-- सौ. अलका वढावकर

हे शारदे ! रूसलीस कां तू, माझ्या वरती ।
लोप पावली कोठे माझी, काव्याची स्फूर्ती ।।

दिनरात्रीं तव सेवा केली, मनोभावें ।
कळले नाहीं आज शब्द ओठचे, कोठे जावे ।।

दिसत होते भाव मजला, साऱ्या वस्तूमध्यें ।
उचंबळूनी जाई मन तेव्हां, नाचत आनंदे ।।

तेच चांदणे तारे गगनी, आणिक लता वेली ।
पकड येईना टिपण्या सौंदर्य, परि या वेळी ।।

जागृत केली मम हृदयांतील, सुप्त जी शक्ति ।
अखंडित वाहूं दे शब्द प्रवाह, हे श्री सरस्वति ।।

डॉ. भगवान नागापूरकर
संपर्क - ९००४०७९८५०
bknagapurkar@gmail.com

न राही तुमचे ते कर्म, ज्यात प्रभू इच्छा अंतीम....१,

प्रत्येक घटनेचे अंग, त्यात मुख्य ईश्वरी भाग....२

तुमच्या मार्फतच होई त्याचा इशारा कोण पाही....३,

सर्व समजे मीच केले अहंकाराने मन भरले....४,

षडरिपू असे साधन खेळविता यावे म्हणून...५,

राग,लोभ, मोह मायादी ठेवती वाटते आनंदी....६,

परि याच्याच शक्तीने प्रभू खेळ चाले युक्तीने....७,

षडरिपू सारे टाळून मुक्ती मिळेल खेळातून.....८

डॉ. भगवान नागापूरकर

९००४०७९८५०

ये दोस्ता ये,करू न्याहारी
तांदूळ,गहू ज्वारी,बाजरी
करू मिळूनी वेळ साजरी
घेऊ नंतर उंच भरारी

दाखवू नकोस प्रेम तुझे उपरेपणाच्या भावनेने ।

तसेच मिळेल परत तुला केवळ वाणीच्या शब्दाने ।।

कंठामधूनी भाष्य निघाले आदळे कर्णपटावरी ।

प्रेमाचा बघूनी ओलावा परिणाम होई मनावरी ।।

शब्द निघता हृदयामधूनी झेप घेई हृदयस्थरावरी ।

आत्म्याची तळमळ भिडते आत्म्याच्या गाभ्यावरी ।।

खोलवर आणिक जाता ईश्वर बिंदूत विलीन होतो ।

सत्याचा शोध लागूनी आनंदाचा पाऊस पडतो ।।

डॉ. भगवान नागापूरकर

९००४०७९८५०

सारे जीवन जाते,

आपले अन्न शोधण्याकडे,

काय उरते आमच्या हाती,

विचार करा थोडे ।।१।।

जीवनाची मर्यादा ठरली,

आयुष्य रेखेमुळे,

आज वा उद्या संपवू यात्रा,

हेच आम्हांस कळे ।।२।।

धडपड करी आम्ही,

सारी देह सुखासाठी,

विचार ही मनांत नसतो,

इतरांच्या करिता ।।३।।

वेळ काढावा जीवनातुनी,

इतरांसाठी थोडा,

सार्थकी लावा आयुष्य तुम्ही,

जीवन शिकवी धडा ।।४।।

डॉ. भगवान नागापूरकर

९००४०७९८५०

मौन पांघरुनी चोरपाऊली
यामिनी, चांणदे पेरीत येते
नि:शब्दी, अव्यक्त भावनां
अलवार मिठीत घट्ट मिटते

दाटता काळोख नभांगणी
घरट्यातुनी विसावतो जीव
प्रतिक्षा! मौनात प्रभातीची
चाहूल, सोनपाऊली सजते

प्रसन्न! उषा किरण कांचनी
जगण्यासाठी देते आत्मबल
तेजाची ही कोवळी किमया
चैतन्याला, उधळीत उजळते

-- वि.ग.सातपुते.(भावकवी)

9766544908

रचना क्र. ५३.

१९ - २ - २०२२.

पदार्थाचे गुण जाणता, एक गोष्ट दिसून येते,

सूक्ष्म भाग अणू असूनी, त्यांत सुप्त शक्ती असते...१,

या शक्तीची तीन रुपे, तीन टोकावर राही,

अधिक उणे नी सम, विद्युतमय प्रवाही....२,

हेच तत्त्व निसर्गाचे , तीन गुणांनी बनले,

उत्पत्ती लय स्थिती, यांनी सर्वत्र व्यापिले...३,

ब्रह्मा विष्णू महेश, प्रतिकात्मक ही रुपे

अणूरेणूच्या भागांत, समावताती स्वरूपे...४,

याच विद्युत शक्तीला, चेतना म्हणती कुणी,

अणूरेणूत लपलेली, ईश्वरमय गुणांनी...५

डॉ. भगवान नागापूरकर

९००४०७९८५०

आता काय बोलायाचे
आता काय ऐकायाचे

घडणारे ते घडूनी जाते
सारे समजून घ्यावयाचे

तडजोडित, मन:शांती
शल्य कुणास सांगायाचे

स्वप्नी आठवांचे मोहोळ
सांगा ? कसे थोपवायचे

ऋणानुबंध गतजन्मांचे
सारे सावरित जगायाचे

मैत्र! निर्मोही सावरणारे
तेच सदा अंतरी जपायचे

मुक्तिचाच ध्यास जीवाला
हरिनामात सुखी रमायचे

-- वि.ग.सातपुते (भावकवी)

(9766544908)

रचना क्र. ३०४

२५/११/२०२२