किती गुरु जीवनात,महत्त्व त्यांचे जाणावे,
सामोरी गुरु कित्येक
त्यांचे मोल ओळखावे,--!!!

आई-बाप श्रेष्ठ गुरु असती,
निसर्ग त्याखालोखाल,
मित्र आणि अनुभव सांगती,
चरित्र आणि वाटचाल,--!!!

कोण कसा आहे कळते,
पाहून संगत त्याची,
मित्रांचे स्थान अढळ,
तेच मानसिकता घडवती,--!!!

आई-बाप जन्मदाते,
सुखदुःखातील मोठे वाटेकरी, नतमस्तकआपण रहावे,
जगताना परोपरी,--!!!

निसर्ग शिकवतो मूकपणे,
ते आपण समजून घ्यावे,
लहान पान सांगते,
असावे कसे जगणे,--!!!

अनुभवाकडून गुरु म्हणुनी,
कित्येक धडेच मिळती,
मौलिक ठरे सरतेशेवटी,
अनुभवाची मोठी शिदोरी,--!!!

अंधारातून प्रकाशाकडे,
फक्त गुरुच ना नेतो,
गुरुविना जीवन सारे,
असा अंधारी चाचपडतो,--!!!

ग्रंथही मोठे गुरु असती,
ज्ञानाचे अपार भांडार,
झुकून सर्वांना नमन ,
क्षणात येता त्यांचा विचार,--!!!

‌. हिमगौरी कर्वे.©

व्यतिरीक्त सौंदर्याच्या पाहूण जे मी

तुझ्या प्रेमात पडाव अस तुझ्यात काहीच नव्हत …….

प्रा. विजय पोहनेरकर यांची
एक लाईटमुडची
खुसखुशीत कविता ......

" डोक्याला ताण करून घ्यायचा नाही "

उगीच गळा काढून
बोन्बलायचं नाही
अन डोक्याला ताण करून
घ्यायचा नाही

कामाच्या वेळेस
खूप काम करायचं
कष्ट करतांना
झोकून द्यायचं
पण Life कसं मजेत जगायचं .......

फिरा वाटलं फिरायचं
लोळा वाटलं लोळायचं
सुनंला काय वाटल ?
पोट्टे काय म्हणतेल ?
फारसा विचार करायचा नाही
अन डोक्याला ताण करून
घ्यायचा नाही ..........!!

पार्टी करा वाटायली
पार्टी करायची
आरती करा वाटायली
आरती करायची

Picture पहा वाटतो
Picture पहायचा
समोसा खा वाटतो
समोसा खायचा

B. P. वाढल का ?
अन शुगर कमी होईल का ?
मला जर ऍटॅक आला
तर दवाखान्यात कुणी नेईल का ?

अरे.......,
लोकं कुत्र्या , मांजराला सुद्धा उचलून नेतेत
तू तर माणूस आहेस ,
मग , नको ती चिंता करतो कशाला ?
स्वतःही परेशान व्हायचं नाही
अन दुसर्यालाही " जाळूजाळू घ्यायचं नाही "
अन डोक्याला अजिबात
ताण करून घ्यायचा नाही ....!!!

लाकडं बाभळीचे आणतील
का चंदनात जाळतील ?
खालून-वरून रॉकेल टाकतील
का एखादा किलो तरी चांगलं तूप टाकतील ?
सगळे पोरं येतील का ?
मला खांदा देतील का ?
फालतू गोष्टीची काळजी
करायची नाही
अन डोक्याला ताण करून
घ्यायचा नाही .......!!!

पोट्ट्याचं लग्न होईल का ?
त्याला कुणी पोरगी देईल का ?
नातवाला
english medium मधे टाकायचं
का Semi english च ठेवायचं ?

अरे तुला काय करायचं ?
मर न ! थोडं जग नं !!
नको त्या गोष्टीचा
कशाला ताण करून घेतो ?
स्वतःही जागतो
अन दुसऱ्यालाही जागवतो

बगलतलं काढून बाजारात
मांडायचं नाही
अन डोक्याला ताण करून
घ्यायचा नाही ......!!!!

लग्न झाल्यावर पोट्ट
विचारील का नाही ?
सुनेला पुरणाची पोळी
येईल का नाही ?

कुलाचार करतेल का ?
सवाष्ण जेवू घालतेल का ?
शेती ठेवतील का विकतील ?
माझं श्राद्ध-पक्ष करतील का ?

आहेत का नाही फालतू प्रश्न ?

अरे बाबा ,
" मल्हार " गा वाटतो
मल्हार गा ...
मकाचं कणीस खा वाटतं
मकाचं कणीस खा

लावण्या आवडतात
सुरेखा पुणेकरचा
कार्यक्रम पहायचा
दिंडीत जा वाटतं
पंढरपूरला जायचं
आंबट गाऱ्हाणे करायचेच नाही
अन डोक्याला ताण करून
घ्यायचा नाही .......!!!!!

सगळ्याचं सगळं करायचं
पण ढोपराचा पंचा काढून
द्यायचा नाही
अन उगीच डोक्याला
ताण करून घ्यायचा नाही ......!!!!

WhatsApp वरील संजीव वेलणकर यांच्या संगीत संगीत आणि फक्त संगीत या ग्रुप वर आलेला लेख साभार प्रकाशित.

मग्न राही सतत आपल्याच कामीं

अन्नासाठी तूं फिरे दाही दिशानी

जमवितेस कणकण एकत्र करुनी

दूर द्दष्टीचा स्वभाव दिला तुज कुणी

सुंदर तुझी वास्तूकला वारुळ केले छान

सहस्त्रांच्या संखे राहतेस आनंदानं

कष्ट करण्याचा गुण दाखवी साऱ्याना

कष्टाला पर्याय नसे ह्या जीवना

-- डॉ. भगवान नागापूरकर

9004079850

bknagapurkar@gmail.com

नाचत होत्या दोन बाहुल्या, इकडून तिकडे ।
टकमक पाहात हांसत होत्या, चोहीकडे ।।१।।

झीम्मा खेळे, फुगडी खेळे, गरगर फिरती ।
हातवारे करुन त्या, माना डोलावती ।।२।।

जवळ येवून गुजगोष्टी, सांगे एकमेकींना ।
सासू नणंद यांच्या, कुलंगड्या काढतांना ।।३।।

सुख दुःखाच्या कथा, सांगितल्या त्यांनीं ।
कांहीतरी करुन दाखवूं, वदल्या दोघीजणी ।।४।।

अज्ञानी गरीब बिचाऱ्या, जेंव्हा संकल्प करती ।
कळसूत्री बाहुल्या त्या, दोर इतरां हातीं ।।५।।

डॉ.भगवान नागापूरकर
९००४०७९८५०
bknagapurkar@gmail.com

कांपू नकोस धरणीमाते
ही नांदी प्रभूच्या आगमनाची वाटते ।। धृ ।।

जागो जागी अत्याचार सर्वत्र दिसे भ्रष्टाचार

वाढले भयंकर अनाचार

गरीब जनता त्रस्त होऊनी जाते

ही नांदी प्रभूच्या आगमनाची वाटते ।।१।।

रक्षण नाही स्त्रियांचे प्रमाण वाढले बलात्काराचे

प्रकार घडती विनयभंगाचे

हतबल होऊनी स्त्री अश्रू ढाळते

ही नांदी प्रभूच्या आगमनाची वाटते ।।२।।

लुट लुट संपत्तीची जाळपोळ घरदारांची

खून पाडती अनेकांचे

प्रेमभावना उरली नसे ह्या जगाते

ही नांदी प्रभूच्या आगमनाची वाटते ।।३।।

गीतेमध्ये दिले वचन अर्जुनासी प्रभूचे तोंडून

प्रभूचे होईल पुनरागमन

अत्याचार वाढता जगाते

ही नांदी प्रभूच्या आगमनाची वाटते ।।४।।

शब्द आपला पाळूनी येईल तो अवतार घेउनी

सुखी करील दु:ख नाशूनी

विश्वास ठेवा गीतेतील शब्दाते

ही नांदी प्रभूच्या आगमनाची वाटते ।।५।।

ठेवा निर्मळ देह आणि मन पवित्रतेचे करा वातावरण

टाळू नका ह्या स्वागत संधीते

ही नांदी प्रभूच्या आगमनाची वाटते ।।६।।

-- डॉ. भगवान नागापूरकर
९००४०७९८५०
e-mail- bknagapurkar@gmail.com

बदलत गेलो घरे मी माझी,

आज पावतो कितीक तरी ।

पोटासाठीं नोकरी करतां,

भटकत होतो आजवरी ।।

बालपण हे असेंच गेले,

फिरता फिरता गावोगावी ।

वडिलांची नोकरी होती,

धंदा करणे माहीत नाही ।।

पाऊलवाट तीच निवडली,

मुलाने देखील जगण्यासाठी ।

तीन पिढ्या ह्या चालत राही,

एका मागून एकापाठी ।।

गेले नाहीं आयुष्य सारे,

स्थिर राहूनी एके जागी ।

देश वेळ आणि घरे निराळी,

जगलो होतो विविध अंगी ।।

शरीर देखील असेच आहे,

आत्म्याचे ते छोटे घरकुल ।

मिळवित असतां सत्व तेज ते,

देह सोडूनी दूजात जाईल ।।

डॉ. भगवान नागापूरकर

संपर्क - ९००४०७९८५०

bknagapurkar@gmail.com

आता तरी देवा मला पावशील का ?
सूख ज्याला म्हनत्यात ते दावशील का ?

पैसा तो अन्यायाचा करी खळबळ
दावी कोणी मजुराला मारुतीचे बळ
न्यायासाठी मदतीला धावशील का ?
सूख ज्याला म्हनत्यात ते दावशील का ?

चोरी करून चोर दूर पळतो
संशयाने गरिबाला मार मिळतो
लाच घेती त्यांना आळा घालशील का ?
सूख ज्याला म्हनत्यात ते दावशील का ?

दिले निवडून जरी आमुचे गडी
जनता पाठीशी त्यांच्या आहे खडी
भलं आमचं करण्याला सांगशील का ?
सूख ज्याला म्हनत्यात ते दावशील का ?

स्वसामर्थ्याच्या तपोबलाने, सागरास मागे हटवून
परशुरामाने निर्माण केला, हा प्रदेश सुंदर कोकण

वळणावळणाची आहे, माझ्या कोकणची वाट
किती वर्णावे सौंदर्य तियेचे, सौंदर्याचा थाट

जरी बदलली अवघी दुनिया, जरी बदलला काळ
माझ्या कोकणच्या मातीसंगे, जुळली माझी नाळ

शहरात राहिलो, तरी खुणावते कोकणातली माती
कौलारू घर कोकणातले, दिसते या डोळ्यांपुढती

देशामध्ये स्वातंत्र्याची, ज्योत जयांनी चेतविली
स्वातंत्र्यवीरांनी रत्नागिरीची, ही भूमी पावन केली

स्वातंत्र्याचे वेड लावले, ज्यांनी ह्या देशाला
लोकमान्य टिळकांचा आहे, अभिमान आम्हाला

कौलारू घराशी जोडले गेले, प्रेमाचे सुंदर नाते
पै पाहुण्यांच्या स्वागतासाठी, सज्ज नेहमी असते

सागरावरती जाऊन पहावा, सूर्योदय देखावा
सागर लहरींचा धिंगाणा, गाजेमधूनी ऐकावा

खेळ पावसाचा रिमझिम चाले, कधी मुसळधार बरसे
इंद्रधनू आकाशी पडता, डोळ्यांना मोहक दृष्य दिसे

जांभळं, करवंदं, ओले काजू, आकर्षक मेवा कोकणचा
स्वाद रेंगाळतो रसनेवरती, तळलेल्या फणस गऱ्यांचा

फणस पोळी, आंबा पोळी, सरबत जांभूळ, करवंदाचे
रत्नागिरीच्या हापूसने नेले, दुनियेमध्ये नाव कोकणचे

छोट्या छोट्या उद्योगांमधूनी, पाऊल पडते प्रगतीचे
देशामध्ये, अन् परदेशातही नाव गाजते कोकणचे

लाल मातीमधूनी साकारली जाते, गणेशाची सुंदर मूर्ती
गणेश उत्सव साजरा करण्या, चाकरमानी नियमित येती

महत्त्व गडकिल्ल्यांचे कोकणच्या, शिवरायांनी ओळखिले
रायगड किल्ल्याला महाराजांनी, राजधानीचे बिरूद दिले

सागर मार्गाने स्वराज्यावरी, होईल गनिमाचा हल्ला
जाणून धोका शिवबाने, सिंधू सागरी सिंधूदुर्ग बांधला

दुष्कर स्वप्नाला कोकण रेल्वेच्या, प्रयत्नपूर्वक साकारले
कोकणी माणसाच्या या स्वप्नाला, मूर्त स्वरूप लाभले

कोकणातले विभ्रम पाहण्या, कमावते घर तिथे असावे
व्यास क्रिएशन्स्च्या मदतीने, या स्वप्नाला पंख फुटावे

-विकास भावे

(व्यास क्रिएशन्स च्या कोंकण प्रतिभा दिवाळी २०२२ ह्या विशेषांक मधून प्रकाशित)

शरीराच्या भुकेसाठी नाही तर पोटाच्या भुकेसाठी गरीब बिचाऱ्या स्त्रिया होत असतात वेश्या… पुरुषातील माणूस जागा झाला कि स्त्री देवी होते आणि पुरुष जागा झाला की मग देवीची वेश्या..