पाऊस चिंब चिंबलेला

करू नकोस विचार त्याचा,

करणे नाही जेंव्हां तुजला

मोलाचे हे जीवन असता,

व्यर्थ दवडशी वेळ कशाला....१

दोन घडीचे जीवन सारे,

क्षणा क्षणाने जाईल निघूनी

कुणासाठी हा काळ थांबला,

उत्तर याचे घे तू शोधूनी....२

लहरी उठतील विचारांच्या,

आघात होता जेंव्हां मनी

विवेक बुद्धीने शांत करावी,

भाव तरंगे त्याच क्षणी....३

मर्यादेचे आयुष्य असता,

वाहू नकोस विचार प्रवाही

भगवंताचे स्मरण करण्या

वेळेची परि बचत करावी....४

डॉ. भगवान नागापूरकर

९००४०७९८५०

bknagapurkar@gmail.com

गिरीश लाड यांनी “जात”या विषयावर केलेले भाष्य…मनाला खुप भावले. पहा तुम्हाला ही उमगते/आवडते का ते..

सीतेकरीता व्याकुळ झाला

अवतारी चक्रपाणी,

अजब ही रामप्रभू कहाणी ।।धृ।।

पत्नीहट्ट त्याला सांगे,

कांचनमृग शोभेल अंगे,

मृगयेच्या तो गेला मागे

प्रसंग घेई रावण साधूनी ।।१।।

अजब ही रामप्रभू कहाणी

रावण नेई पळवूनी सीता

दिसेना रामा कोठे आता

तरुवेलींना पुसत होता

वाहत होते अश्रू नयनीं ।।२।।

अजब ही रामप्रभू कहाणी

वाणी ज्याच्या शक्ती शिवाची

ह्रदयामाजी दया सागराची

त्यालाही दिसे नियती खेची

सामान्यतेच्या मापी तोलूनी ।।३।।

अजब ही रामप्रभू कहाणी

डॉ. भगवान नागापूरकर

९००४०७९८५०

मला राज रस्त्यावरुन
चालता येत नाही
कारण ती शान
मला पेलवत नाही |

मला हम रस्त्यावरुन
चालता येत नाही
कारण सुखदु:खाच्या गर्दीतून
वाट काढता येत नाही |

मला आड वाटेंने
चालता येत नाही
कारण त्याचा तोकडेपणा
मला झेपत नाही |

मला वळणा-वळणाने
चालता येत नाही
कारण भोवळ येऊन
मला मार्ग दिसत नाही |

मला काट्याकुट्या
पायवाटेंनं चालतां येतं
कारण त्या काट्यांच्या टोकाला
माझंच रक्त लागलेलं असतं |

कृष्ण कमळ-

पर्वत शिखरीं जाऊन,खोदून आणली माती
कौशल्य पणास लावून,केला मी गणपती ।।१।।

मुर्ती बनली सुरेख,आनंद देई मनां
दाम मिळेल ठिक,हीच आली भावना

घेऊन गेलो बाजारीं,उल्हासाच्या भरांत
कुणी न त्यासी पसंत करी,निराश झालो मनांत

बहूत दिवस प्रयत्न केला,कुणी न घेई विकत
कंटाळून नेऊन दिला,गणपती मी शाळेत

भरले होते भव्य प्रदर्शन,हस्तकला कौशल्याचे
नवल वाटले गणपती बघून,दालनातील सुरवातीचे

चकीत झालो जाणूनी,मिळाला राष्ट्रीय पुरस्कार
गणपतीच्या भव्यतेनी,मिळवीला हा अधिकार

डॉ. भगवान नागापूरकर
९००४०७९८५०
bknagapurkar@gmail.com

मन विवस्त्र आहे
मेंदूचा बंधना शिवाय!

संस्कार रूपी बंधनाने
खरच का मन नियंत्रणात राहिल का
मोहाला आवरता येईल का
चांगल्या संस्कारात गुंतवून

मायेन वासनेला थोपवता येईल का
स्वैराचार रोखता येईल का
शिस्तीत जीवन जगून!

अशा गुंतागूती सरळ उत्तर मिळणार नाहीत
पण जरा चांगल्या संस्काचा आवरणात वावर
शिस्तीत रहायचा प्रयत्न कर
तुझा तुलाच प्रत्यय येईल.

नियंत्रणात उच्च कोटीच्या स्वैर विचारांचे सुख मिळविता येते.

श्रीकांत बर्वे

वळून बघतां गतकाळाला, चकीत झाले मन ।

घटना घडल्या जीवनामध्यें, राही त्यांची आठवण ।।

चालत असतां पाऊल वाट, जीवन रेषे वरची ।

स्वप्न रंगवी मनांत तेंव्हा, भावी आयुष्याची ।।

परिस्थितीच्या भोवऱ्यामध्यें, पुरता गुरफटलो ।

फिरणाऱ्या त्या वर्तुळातूनी, बाहेर येवूं न शकलो ।।

कल्पिले होते नियतीनें, तेच घडविले तिनें ।

भंग पावले स्वप्नचि सारे, तिच्याच लहरीनें ।।

असेच घडते जीवनीं सदा, अघटीत-अवचित ।

समजूनी त्यासी ईश्वरी इच्छा, स्वीकारी आनंदात ।।

डॉ. भगवान नागापूरकर

९००४०७९८५०

“सोड मानवा , सोड रे ! हे वागणे आहे लज्जास्पद ,

तुला पाहूनी असे, लाजेल एखादे श्वापद…!

भल्या मोठ्या अपेक्षांची भली मोठी रास रचतोस,

गैरसमजुतीची ठिणगी पडताच, प्रेम वृत्ती मागे सरतोस…!

सन्मान, सचोटी,आदराचा खोटा सोहळा थाटतोस,

तुझा हट्ट हेका मात्र शिरतुरा खोचून सांगतोस…!

नतद्रष्ठ बुध्दी तुझी रे, अजाणते समज बाळगतोस,

सारासार विचार न करता, बंध नात्यांचे चिरडतोस…!

स्वार्थी मन, वासना तुझी रे, दानवासम वागतोस,

म्हणवूनी सत्पुरुष स्वतःस , अहंकाराचा मुकुट घालतोस…!

कुत्सित भावना, कुंठित विचारांची बाजारपेठ मांडतोस,

निर्लज्जपणे तूच तुझी माणुसकी खुलेआम विकतोस…?

सोड मानवा, सोड रे! हे वागणे आहे लज्जास्पद…..!”