दोघे मिळून आलां
हातात घेऊन हात
हाताळूनी परिस्थितीला
करण्या त्यावर मात

दोघांची मिळूनी शक्ति
दुप्पट होत असे
सहभागी होतां, युक्ति
यशाची खात्री दिसे

एकाच तेजाची तुम्ही बाळे
बरोबरीने आलां जगती
रवि-किरण होऊन जुळे
प्रकाशमान बनती

ओळखुनी जीवन धोके
यशाच्या मार्गांत
गाडीची बनूनी चाके
सतत रहा वेगांत

एकाचे पाठी जाता दुसरा
यश अल्पची मिळे
एकत्र मिळूनी काम करा
तुम्ही आहांत जुळे

-- डॉ. भगवान नागापूरकर
९००४०७९८५०
bknagapurkar@gmail.com

आत्म्याचे मिलन परमात्म्याशी,

हेच जीवनाचे ध्येय असे,

आत्मा ईश्वरी अंश असूनी,

त्यालाच मिळण्या उत्सुक असे ।।१।।

देह पिंजऱ्यांत अडकता,

बाहेर येण्या झेप घेई तो,

अवचित साधूनी वेळ ती,

कुडी तोडूनी निघून जातो ।।२।।

कार्य आत्म्याचे अपूरे होता,

पुनरपी पडते बंधन,

चक्र आत्म्याचे चालत राही,

मुक्त होण्याचा येई तो क्षण ।।३।।

डॉ. भगवान नागापूरकर

९००४०७९८५०

bknagapurkar@gmail.com

मी सवंगड्यां सोबती राहतो
जीवनी, सुखसागरी डुंबतो

विसरूनिया साऱ्या व्यथ्यांना
वैफल्यातही सुखानंदी जगतो

शैशवी, आठव सारे खट्याळ
मैत्रभावनांच्या स्मृतीत जगतो

मित्र भेटीस, मी आसुसलेला
गळाभेटीच्या प्रतीक्षेत जगतो

जरी हरविले क्षण सारे यौवनी
अंतरी, निज शैशवात जगतो

मित्रांसोबती, नशा यौवनाची
निडर, निवांत तृप्ततेत जगतो

जीवास नाही कुठलीच चिंता
हसुनी, हसवत नित्य जगतो

मी आज उभा, पसरुनीया बाहु
स्वानंदा! मुक्त उधळीत जगतो

-- वि.ग.सातपुते. (भावकवी)

9766544908

रचना क्र. ८१.

१४ - ३ - २०२२.

तुझी अबोलताही
बोलून जाते बरेच काही
तुला उगाच वाटते
मला काही कळत नाही

मी तुला कधी
तसा कळलोच नाही
तुला विसरून
मी कधी जगलोच नाही

तुझ्यापासून तसा दूर
मी कधीच गेलो नाही
माझ्या हृद्यातील तुझी जागा
कधी रिकामी झालीच नाही

आता बोलली नाहीस तू
तर जमणार नाही
तुझ्या माझ्या मिलनाची आशा
मग उरणारच नाही

©निलेश बामणे

अ,आ,इ,ई,उ,ऊ, गिरवित

पाटी पुस्तक हातीं घेतले

ह,ळ,क्ष,ज्ञ, करुनी शेवटीं

खरेच मजला ज्ञान मिळाले

आरंभातील ' अ ' शिकूनी

अहंकार तो जागृत झाला

तो तर राजा षढरिपूचा

ज्ञानास त्याने दुर सारला

अज्ञान- राज्यामघ्यें भटकतां

स्वतःशी गेलो विसरुनी

ज्ञानी झालो आहोंत आपण

समजे चार पुस्तके वाचूनी

हालके हालके पुढे चाललो

'अ' 'आ' सोडूनी 'क्ष' ज्ञ' पर्यंत

ज्ञान प्राप्त ते मज जहाले

अंहंकाराचा होऊनी अंत

'ज्ञ' ज्ञानाचा तेंव्हांच जाणले

अहंकारातील 'अ' विसरतां

'अ' आणि 'ज्ञ' साधूनी

अंतर् ज्ञानात डुबून जातां

डॉ. भगवान नागापूरकर

९००४०७९८५०

मूल्य नाही कुणा, तूं दिल्या वेळेचे
गमावून टाकी, जाणूनी फुकाचे....१,

लागत नसते, दाम वेळेसाठीं
म्हणून दवडे अकारणा पोटीं....२,

वस्तूचे मूल्य ते, पैशांनीच ठरते
समज सर्वांची, अशीच असते...३,

वेडे अहा सारे, कसे होई मूल्य
वेळ जातां मग, आयुष्य जाईल...४,

वेळ दवडतां, कांहीं न राहते
सर्वच जीवन, व्यर्थ तें ठरते....५

-- डॉ. भगवान नागापूरकर
९००४०७९८५०

वृत्त :- आनंदकंद

सोडून साथ सारे साथी निघून गेले
ठेवून एकट्याला, पक्षी उडून गेले

घेऊन शीर हाती सैनिक तुटून पडले
ही बातमी मिळाली, शत्रू पळून गेले

दुष्काळ कोरडा हा डोळ्यात पूर आले
जित्राब पोसलेले भूके मरून गेले.

रडणार कोण येथे मरणास रोजच्या या
डोळ्यातले तळेही आता सुकून गेले

दुनियेस जिंकणारे तोऱ्यात फार आले
जिंकायचे सदा पण ,येथे हरून गेले

तांडे भुकेजलेले बेजार फार होते
बदल्यात भाकरीच्या गाई विकून गेले

रूपात सारथ्याच्या कृष्णास पाहताना
अवसान कौरवांचे साऱ्या गळून गेले

होतो जिवंत तेव्हा दारी कुणी न आले
मरताच मी कशाला खोटे रडून गेले

© जयवंत वानखडे,कोरपना

-- स्वाती ठोंबरे.

झोप घ्या हो शांत, जागृत राहूनी तुम्ही,

विचित्र वाटे ही रित, परि येई तुमचे कामी ...१

विश्रांती लागत असते, गरज म्हणून शरिराला

ती तर मिळत नसते, केव्हांही तुमच्या मनाला ..२

चंचलता हा स्वभाव, आहे आपल्या मनाचा,

शांत करण्या मना, उपाय नसे झोपेचा..३

एकाच दिशेने धावूनी, मिळवते मन विश्रांती

एकाग्र चित्त असणे, उपाय हाच त्यावरती...४

चित्त करूनी एकाग्र, दिशा त्यास या प्रभूसाठीं

मिळेल सारे तुम्हां, जागृत राहण्या पोटीं...५

डॉ. भगवान नागापूरकर

संपर्क - ९००४०७९८५०

bknagapurkar@gmail.com

सर्वांचा विश्वास । सहजी बसेल
ऐसे शुद्ध शील । ठेवीन मी ।॥।१॥।
देव, देश, राजा । गुरु आप्त दृष्ट
यांशी एकनिष्ठ । राहीन मी ।॥।२॥।
अनाथांच्या साह्या । जाईन धावून
त्यासाठी झिजवीन । काया माझी ।॥॥३॥।
सानां कुरवाळीन । वंदीन थोरांना
बंधु सकलांना । मानीन मी ।॥४।।
सौजन्य दावीन । स्त्रिया-बालकांशी
वृद्ध-निर्बलांशी । निरपेक्ष ।।५॥।
मुकी जनावरें । गणूनिया मित्र
भूतदया व्रत । आचरीन ।।६॥।
गुरु, आईबाप । अधिकारी खरे
आज्ञा त्यांच्या त्वरे । पाळीन मी ।॥७॥।
कोसळो संकटे । कर्तव्य कठीण
मनाने प्रसन्न । राहीन मी ।॥८॥।
शरीराने शुद्ध । मनाने निर्मळ
कृतीने सरळ । राहीन मी ।।९।।