चिव चिव करीत, एक चिमणी आली ।

दर्पणाच्या चौकटीवरती, येवून ती बसली ।। १

बघूनी दूजी चिमणी दर्पणी, चकीत झाली होती ।

वाटूं लागले या चिमणीला, आंत अडकली ती ।।२

उत्सुकता नि तगमग दिसे, चेहऱ्यावरी ।

चारी दिशेने बघत होती, आंतल्या चिमणी परी ।।३

औत्सुक्याचे भाव सारे दिसती, आतील चिमणीतही ।

कशी करूं तिची बंधन मुक्ती, काळजी लागून राही ।।४

चोंच मारीते आवाज करिते, यत्न्य केले सारे ।

श्रम होवूनी थकूनी गेली, हातीं न कांहीं उरे ।।५

चिंता लागली चिंता बघूनी, या चिमणीला ।

चलबिचल ही जेवढी होती, तसेंच दिसे हिला ।।६

स्वबांधवांना मदत करणे, त्यांच्या संकटी ।

पशू पक्षांतही दिसून येते, तत्वें ही मोठी ।।७

चालले होते प्रयत्न निष्फळ, या चिमणीचे ।

परि जिद्द ठेवतां भान नव्हते, आपल्या देहाचे ।।७

कांच पडली फूटून खालती, तडा त्यास जावूनी ।

एक आवाज तेथे घुमला, घाबरली चिमणी ।।८

जरी देह झाला रक्तबंबाळ, यश चमकले तेथें ।

समजत होती चिमणी बिचारी, बंधन तोडले ते ।।९

डॉ. भगवान नागापूरकर

९००४०७९८५०

रावण नव्हता कुणी राजा, ती होती व्यक्ति ।
व्यक्तीचा तो इतिहास नव्हता, ती होती प्रवृत्ति....१,

आजही दिसती कित्येक आम्हा, रावण या जीवनीं ।
कशी रंगेल जीवन कथा, रावणा वांचूनी...२,

विरोधात्मक बुद्धी तुमची, अडथळे आणते ।
क्रोध, लोभ, अहंकार गुणांनी, प्रवाहाला रोकते...३,

सद्‌गुणांचा पाया खोलवर, जेवढा तो गेलेला ।
रावण वृत्ति हार जाईल, त्याच मग वेळेला....४

डॉ. भगवान नागापूरकर
संपर्क - ९००४०७९८५०
bknagapurkar@gmail.com

कुठे शोधू तुला, ध्यास लागला मनी

वाटे मजला, तू बसलास लपुनी

इंद्र धनुष्याचे रंग, आकर्षक वाटती

बघण्यात दंग, लक्ष वेधुनी घेती

ओढ्याची झुळझुळ, पडे कानावरी

ऐकून नाद मंजुळ, मना वेडे करी

फुलातील गंध, तल्लीन करी मना

होऊनी मी धुंद, विसरे सर्वाना

फळातील रस, देई मधुर स्वाद

उल्हासी मनाला, देऊनी आनंद

वाऱ्याची झुळूक, रोमांचकारी

देई देहा सुख, अल्हाद्कारी

रंग, गंध, रस, स्पर्शात, तुझ्या अस्तित्वाची जाण

तू लपलास गुणांत, तुला शोधणे कठीण

डॉ. भगवान नागापूरकर

९००४०७९८५०

e-mail- bknagapurkar@gmail.com

कर पडले चरणीं

भाव जाण तू देवा ।।धृ।।

देह झुकला तुझ्या पुढती

लिनतेनें मान वाकती

मनाची करूनी एकाग्रता

भावनेला वाट देतां

अश्रू दाटले नयनी अंतरीचा दिसे ओलावा १

कर पडले चरणी भाव जाण तू देवा,

प्रथम येई भावना,

जागृत करते ती मनां

मनाचा ताबा देहावरी

तोच तुजला प्रणाम करी

घे प्रभू तू जाणूनी अत:करणातील ठेवा २

कर पडले चरणी भाव जाण तू देवा

मुखीं नाम तुझे घेई

देह सारा शहारून जाई

आनंदाची फूटते उकळी

नाचते मन सर्व काळी

मनाचा चंचल स्वभाव समजोनी तूं घ्यावा ३

कर पडले चरणी भाव जाण तू देवा

डॉ. भगवान नागापूरकर

९००४०७९८५०

आर्त तन हे, आर्त मन हे,
करुणानिधे,तुला साद रे,
शांती, प्रेम, आस्था,
गेल्या भावना कुठे रे,--!!!

उगा काळीज उलते,
मन किती धास्तावते,
का मम अंतरातुनी,
अस्वस्थपण छळते रे,--!!!

सांग तुझ्याविना माझा,
असेल कोण त्राता रे,
कोलाहल दाटे मनी,
ही जीवनाचीच करणी,
घायाळ हृदया, न वाली,
जावे कुठे,विधात्या रे,--!!!

सुखाची कशी वानवा असे,
दुःख, अमोज अगणित रे
जीवनाचेच गणित चुके,
ही भल्याभल्यांचीच कथा रे,--!!!

जे हवे ते मिळत नाही,
नको तेच वाट्यास येई,
जे मिळे,ते पुरत नाही,
समाधान मानावे कशात रे,--!!

प्रेम कुणालाच कळत नाही,
नात्यात विफलता येई,
ताणतणावां माप नाही,
जीव सदैव बेचैनी राही,
आधारच नच कोणी,
सांगू कोणा व्यथा रे,-!!

भोवताली माणसांचे रान,
वाटा वाकड्या, सुनसान,
जिवाची फक्त उलघाल, अंतरात्मा किती रडे रे,--!!!

शोधिते मी पहा तुला,
इकडून तिकडे, सगळीकडे,
कुठे असशी तू ,
कुठे का न दिसशी तू ,
आत,जीव कसानुसा रे,--!

हिमगौरी कर्वे ©

अंतर्मनात
शोधण्या तुजला
मन कधीचे आतुर

शिव कुणाचे चिंतन करितो ?
प्रश्न पडला मनी,
तोच तर आहे प्रभू जगाचा
काय तयाचे ध्यानी...१,

जेव्हां आम्ही चिंतन करितो,
ध्यान लावी प्रभूकडे,
प्रयत्न करूनी जगास विसरे,
लक्ष केंद्रितो त्याजकडे....२,

उलट दिशेने शिवाचे चिंतन,
चालते जगतासाठीं
ध्यानामध्यें स्वतःसी विसरे,
लक्ष्य त्याचे इतरासाठीं ....३

डॉ. भगवान नागापूरकर
९००४०७९८५०
bknagapurkar@gmail.com

आजकाला थोडेच व्यक्त होण्यात मजा आहे
इथे उगा व्यर्थ वाचाळपंचविशिचे वावडे आहे

सर्वार्थीच हितावह मंत्र , मौनं सर्वार्थ साधनम
आज इथे कुणाचेच कुणाला काय पडले आहे

संसारी रोज रोज नवनवीन समस्यांचे कोड़े
चिंतित जीवाला नित्य सामोरी जायचे आहे

विज्ञानयुगी कालचेही आज कालबाह्य ठरते
जगणे आज सर्वार्थांने सर्वापुढे आव्हान आहे

केवळ पैशानेच कां ? सुखाचे रांजण भरती
अंतरिची निर्मल निष्पाप भावना सुखदा आहे

निःसंकोची साथ मानवतेची आधार स्पंदनाना
हा सत्यार्थ जीवनाचा उमजण्यात विवेक आहे
**********
--वि.ग.सातपुते (भावकवी)

(9766544908)

रचना क्र. 322

7/12/2022

जगामंदी व्हावी थोर
मनी अशी एक आशा
मातीच्या गंधाने शोभे
मराठी जी मातृभाषा

डंका तिचा वाजतील
मराठमोळी लेकरं
बोल तिचे घुमतील
साताही समुद्रापार

सदैव तिच्या रक्षणा
तत्पर आपण राहू
तिच्या या सामर्थ्याने
नभदिशा धुंद पाहू

अभिजात सहवास
लाभे अनादिकाळाने
चंद्र, सूर्य, तारे नभी
येतील पुन्हा नव्याने

जोडतो मनांत तारा
सह्यगिरीवरी वारा
तिचे गुणगाण गाऊ
तिची आरतीही करा

असा तिचा लाभे लळा
मायलेकरू जिव्हाळा
नम्र असे माझा माथा
जसा पुरात लव्हाळा

विठ्ठल जाधव
शिरूरकासार,जि.बीड
सं. ९४२१४४२९९५

रुजविता बियाणें अंकूर फुटती

असतील दाणे जसे तेच उगवती

पेरता आनंद आनंदचि मिळे

प्रेमाची बियाणें प्रेम आणी सगळे

शिवीगाळ करुनी आदर येई कसा

शत्रुत्त्वासंगे नसे मैत्रीचा ठसा

घृणा दाखवूनी कसे येई प्रेम

क्रोधाच्या मोलाचे शांती नसे दाम

पेरावे तसें उगवतें नियम हा निसर्गाचा

सुख दुःखाला कारण स्वभाव ज्याचा त्याचा

--डॉ. भगवान नागापूरकर

९००४०७९८५०

bknagapurkar@gmail.com