तुझ्या मिठीतून बाजूला होता ना,
माझे काही श्वास तुझ्या मानेवर राहिले.

क्षणभर थांबली होती ती शांत हवा,
आपल्या दोघांतले शब्द ओठांवर राहिले.

डोळ्यांत साचून राहिलं न बोललेलं काही,
आणि अर्थ सगळे त्या नजरेतून वाहिले.

रात्रीने विचारलं, “आठवण कुणाची?”
मी हसलो… तुझेच नाव ताऱ्यांवर राहिले.

वेळ पुढे गेला, अंतरही वाढलं,
तरीही तुझे स्पर्श हृदयात राहिले.

आजही एकांतात जेव्हा स्वतःला शोधतो,
तुझ्या अस्तित्वाचे ठसे माझ्यातचं राहिले.

•ॲड.कीर्तिराज शैलेंद्र आगलावे, पुणे

बाळ चिमुकले,
गोड हासले,
रांगत आले ,
पायाला धरुनी,
उभे राहिले,
बाळकृष्ण ते,
मला भासले, --
वदनांतून कोवळे,
ध्वनि उमटले,
बोबड्या स्वरांनी,
मज जिंकीयले,
उचलून घेता ,
कसे आनंदले,
हात हलवून ,
मज कुरवाळले,
कोण लहान,
मग वाटले,
कुशीत त्याच्या,
मीच शिरले ,
हलके हलके,
त्याने थोपटले,
गा,---गा कर ,
मज म्हणाले,
निश्चिंत जीव,---!!!
निश्चिंत मन ,-----!!!
मज विश्वरूपदर्शन,
अलगद घडले,--!!!!

हिमगौरी कर्वे.©

ऋतू हा बरवा, वसंत हा आला,
नवा गंध घेऊन आनंद फुलला.
हिरव्या पानांनी धरित्री नटली,
सुगंधी फुलांनी दिशा मोहरली.

मंद मंद वारे सुरेल गीत गाती,
वनी कोकिळा मधुर स्वर छेडिती.
नभी इंद्रधनू रंग उधळून जाते,
निसर्गात सारी सृष्टी न्हाऊन निघते.

शिवारात डोलती सोन्याची शेते,
श्रमिकांच्या मुखी उमलती हसू फुले.
नदीचे जल गाते प्रसन्न गाणी,
भरुनी जीवनी नवी चेतना आणी.

असा हा ऋतू दे सुखाचीच छाया,
मनी प्रेम, शांती, नवी मंगल माया.
निसर्गा तुझ्या या कृपेचा ठेवा,
सदा लाभो आम्हा ऋतू हा बरवा.

•ॲड.कीर्तिराज शैलेंद्र आगलावे, पुणे ✨
मो:- 9011841212

उद्या' साठी जगतो आम्हीं राहून मृत्युच्या दाढी ।

भविष्यांतील सुख कल्पूनी आज सारे कष्ट काढी ।।

'आज' राहतो नजिक सदैव 'उद्या' चालतो पुढे पुढे ।

आज नि उद्या यांची संगत कधीही एकत्र न पडे ।।

कष्ट 'आज' चे शिरीं वाहूनी ध्येय 'उद्या' चे बघती ।

हातीं न कांही पडते तेव्हां निराश सारे होती ।।

समाधान चित्तीं आणण्या प्रयत्न सारे 'आज' व्हावे ।

'आज क्षणाला' अस्तित्व असतां भविष्याला सोडून द्यावे ।।

डॉ. भगवान नागापूरकर

९००४०७९८५०

प्रभू दयेची बरसात,
चालू असते सतत,
ज्ञानाची गंगोत्री वाहते,
पिणाऱ्यालाच मिळते ।।१।।

प्रत्येक क्षण दयेचा,
टिपणारा ठरे नशीबाचा,
जलात राहूनी कोरडे,
म्हणावे त्यास काय वेडे ।।२।।

फळे पडतां रोज पाही,
त्याची कुणा उमज न येई,
परि न्यूटन एक निघाला,
बघे गुरुत्वाकर्षण शक्तीला ।।३।।

चहा किटलीचे झाकण हाले,
स्टिफनसनने इंजीन शोधले,
जीवनातील साधे प्रसंग,
शास्त्रज्ञांची बनले अंग ।।४।।

प्रभू असतो सतत तयार,
ठरवा दया कशी घेणार,
प्रयत्न होता अंतःकरणी,
यश लाभेल घ्यावे समजोनी ।।५।।

डॉ. भगवान नागापूरकर
संपर्क - ९००४०७९८५०
bknagapurkar@gmail.com

ऐलमा पैलमा गणेश देवा
माझा नवरा बदलून दे, करीन तुझी सेवा
जन्मोजन्मी कसले, एका जन्मी झाले बोsssर
मी नाही गुंडाळायची, वडाला आता दोsssर
हरतालकेचा उपासही नाही करणार

ऐलमा पैलमा गणेश देवा.......
सांगते ऐका तुमचा मी, कां करते धावा

संसाराला आता माझ्या, वर्ष झाली तेरा
नव्या नवलाईचे वाजले की बारा,
नवरा कशा-कशामध्ये लक्ष देखील घालेना,
संसाराचा गाडा मला एकटीला झेपेना,
धडा शिकवू ह्यांना अस आलय माझ्या मना
म्हणून म्हणते हात जोडून गणेश देवा
Exchange Offer च, तेवढ मनावर घ्याना
मीच काय किती जणी
करतील तुमची सेवा
ऐलमा पैलमा गणेस देवा..........

-- सौ.अलका वढावकर

गोफ विणू बाई गोफ विणू अर्ध्या रात्री गोफ विणू
गोफ नको बाई गोफ नको त्यापेक्षा टिव्ही पाहू
गरे घ्या गरे पोटाला बरे नाही खाई त्याची म्हातारी जगे
जगली तर जगली आहे तशी चांगली
वृद्धाश्रमात राहते बापडी.

तुझ्या आठवणीत
शब्द विरघळतात
पाझरतात भावनां
हळवा होतो एकांत...

मी आभाळ पहातो
तरळतेस तूच नेत्रात
हाच भास विलक्षण
हळवा होतो एकांत...

ही सुरम्य प्रीत वेडी
तुझेच रुप पापणीत
मी मज भुलुनी जाता
हळवा होतो एकांत...

स्मरण तुझेच लाघवी
नित्य माझ्या अंतरात
तुजविण सुनेच सारे
हळवा होतो एकांत...

--वि.ग.सातपुते.( भावकवी )

9766544908

रचना क्र.२०८

१९/८/२०२२

घरधनी तीचा |भेटण्यां विट्ठला ||
वारीस निघाला |पंढरीच्या ||१||

घरदार सारं | वावर सोडून ||
कर्ज गा काढून | तीर्थ करी ||२||

डवरण्या शेत |नाही गडी कोणी ||
गेला घरधनी | पंढरीसी ||३||

वावरात तीच्या | माजले रे तण ||
करिते निंदण | एकटी ती ||४||

आभाळ फाटलं | लागली ही झड ||
झाली पडझड | गावोगावी ||५||

पाऊस बोवारा | कधीचा थांबेना ||
तीला करमेना | घरामंधी ||६||

हंबरते बैल | गोठ्यात जोरानं ||
रिकामी गव्हाण | पाहुनिया ||७||

नाही पाहवला | त्यांचा कळवळा ||
उचलून विळा | निघाली ती ||८||

मुक्या त्या जिवात |दिसला रे तीला ||
देव लपलेला | भूकेजुन ||९||

सांगिले संतांनी | करा भूतदया ||
द्यावी रे बा माया | प्राणीमात्रा ||१०||

आचरले तीने | आवडीने व्रत ||
नाही पंढरीत | देव तीचा ||११||

-- © जयवंत वानखडे,
कोरपना