Login Here Join Now

C-डॉ. सुभाष कटकदौंड

Sort By:

This articles are displayed in the order of publishing date
This articles are displayed in the order of modification date
The Articles are displayed in the order of publishing date. Oldest first.
The Articles are displayed in ascending order of title
The Articles are displayed in descending order of title
पोर्टलवरील नव्यांसोबत जुने लेखही वाचकांना दिसावेत यासाठी खालील यादी Random पद्धतीने आहे. विशिष्ट क्रमामध्ये यादी हवी असल्यास वरीलपैकी Radio Button क्लिक करा.
  • मायेचा स्पर्श

    दिवाळीच्या सुंदर दिव्यांवर
    अती उत्साहाने फूंकर घातली
    ...
    आणि फटाक्यांची माळ
    माझ्या हातातच फूटली

    जखम पाहुन सारी हळहळली
    वेदना मला ती असह्य झाली
    छोटी अनु जरी घाबरली
    धीर दिला मला,नाही ती रडली

    अगदी शांतपणे येऊन
    माझ्या उशाशी ती बसली
    मांडीवर डोकं घेऊन

    मायेने हात फिरवु लागली

    मी बळेबळे हसलो
    पण ती नाही फसली
    माझी वेदना तिच्या डोळ्यात
    स्पष्ट मला दिसली

    पप्पा, उगी उगी म्हणत
    मला थोपटू लागली
    संयमाने आसवांना
    पापण्यात दडवू लागली

    कोवळ्या त्या स्पर्शाने
    मनाला शांती मिळाली
    तळमळनाऱ्या वेदनेलाही
    हळूहळू झोप लागली

    शमलेली माझी वेदना
    माझ्या चेहऱ्यावरुन तिला कळली
    बघून माझ्याकडे
    अगदी गोड होती हसली

    सारे म्हणु लागले,
    कशी हिला ऐवढी समज आली ?
    तेंव्हा पहिल्यांदा वाटलं
    छोटी अनु मनानं खूप मोठी झाली.

    - डॉ.सुभाष कटकदौंड

      September 5, 2018


  • स्वप्न पहावीत…

    स्वप्न पहावीत...
    नाही कोण म्हणतंय ?
    स्वप्नं जरूर पहावीत.
    इतकी सारी पहावीत की
    त्यांची ढिगारे व्हावीत.

    भान ठेवून उघड्या डोळ्यांनी
    त्या स्वप्नांकडे पहावं.
    निर्धाराच्या अचूक बाणाने
    त्या स्वप्नांना वेधावं.

    स्वप्नांसाठी आजच्या वर्तमानाला
    निरर्थक नाही मारावं.
    उद्यासाठी आजच्या क्षणाला
    व्यर्थ नाही टाळावं.

    अशक्य अश्या स्वप्नांसाठी
    शरीराने जरूर थकावं.
    पण न खचता मनानं
    पून्हा धैर्यानं उठावं.

    तुटलेल्या मोडलेल्या स्वप्नांसाठी
    कधी नाराज नाही व्हावं.
    नव्या उमेदीने नव्या स्वप्नांकडे
    दृढविश्वासाने पहावं.

    स्वप्नांना कसं स्फूर्तीनं अन्
    अगदी आनंदानं हाकावं.
    अस होऊ नये की त्या स्वप्नांसाठी
    बिचाऱ्या निद्रेनेच थकावं.

    हरवलेल्या त्या स्वप्नांसाठी
    कधी व्यर्थ नाही झुरावं.
    नव्या अशा स्वप्नांसाठी झोपेला
    अगदी शांत मनाने भरावं.

    डॉ.सुभाष कटकदौंड

      September 4, 2018


  • अंत्यसंस्कार…मी अनुभवलेला

    हसते बोलते बाबा
    अचानक शांत झोपले
    नियतीची क्रूर चेष्टा ती...
    मी त्या विधात्याला कोसले

    आठवणींचे मडके
    हाती जड झाले होते
    सिद्धार्थाचे दूःख तेंव्हा
    पहिल्यांदा समजले होते

    जिवंतपणी विचारलं नाही
    ते हवे नको बघत होते
    प्रेमाचे अगदी जवळचे
    घरचे कार्य समजत होते

    सर्वजण धीर देत होते
    माझे डोळे पुसत होते
    माझे जड डोके मात्र
    बाबांचा खांदा शोधत होते

    धुराच्या आडोश्यात
    मूद्दामच उभा राहिलो
    न थांबणाऱ्या आसवांना
    पापण्यात लपवू लागलो

    एका मरणाचा सोहळा तो
    सर्व जण पूजत होते
    जिवनाचा थारोळा बघण्यास
    मन माझे धजत नव्हते

    चितेभोवती फिरत होतो
    फूटके मडके सांडवत होतो
    मूक्या भावनांचे सांत्वन
    माझे मीच करत होतो

    उघड्या माझ्या अंगावरून
    पाणी घळघळत होते
    दूःखाने जणू माझे
    काळीजच भळभळत होते

    निरंकार अश्या दृष्टीने
    चितेकडे पहात होतो
    संपत चालले होते ते मरण
    आणि मी मात्र जळत होतो.

    डॉ. सुभाष कटकदौंड

      August 29, 2018


  • प्रेमाची नाही वेगळी कहाणी

    नाही ग मी राजा
    पण तू आहेस माझी राणी
    आपल्या प्रेमाची नाही
    वेगळी अशी कहाणी...

    सांग मला एकदा
    काय आहे तुझ्या मनी ?
    जुन्या त्या आठवणींनी
    नको डोळ्यात पाणी

    नको होऊस तू दूःखी
    थोड्याश्या विरहानी
    प्रेम नाही होणार कमी
    जरी ढळेल जवानी

    आपल्या प्रेमाची नाही
    वेगळी अशी कहाणी...

    आपण फक्त जवळ बसावं
    धुंद करेल रातराणी
    आयुष्य असंच फूलत रहावं
    कायम प्रेमाच्या फुलांनी

    नाजुकशा कोमल शब्दांना
    रंगवावं तू प्रेमानी
    मीही गाईन तुझ्यासाठी
    सुंदर प्रणयाची गाणी

    आपल्या प्रेमाची नाही
    वेगळी अशी कहाणी...

    प्रेमाला नको ओहोटी
    अगदी कोणत्याही क्षणी
    भिजवत राहीन सदैव
    तुला प्रेमाच्या लाटांनी

    बांधला सुंदर ताजमहाल
    मुमताजसाठी शहाजहाननी
    प्रेम कसं व्यक्त करू माझं
    नाही कोणतीही निशाणी

    आपल्या प्रेमाची नाही
    वेगळी अशी कहाणी

    - डॉ. सुभाष कटकदौंड

      August 25, 2018


  • मुक्या वेदना

    प्रेमाच्या जुन्या आठवणीं
    आता सुन्या झाल्या आहेत
    अव्यक्त अश्या त्या वेदना
    आता मुक्या झाल्या आहेत

    माझ्या सुंदर अश्या जीवनातून
    तू का गेली ते कळलच नव्हतं
    तू नसलेल्या त्या गोष्टींमध्ये
    मन माझं कधी रमलच नव्हतं

    अडकलेल्या पाशातून स्वतःला
    मुश्किलीनं सोडवलं मी
    नव्या स्नेह बंधनात मनाला
    अगदी हलकेच गुंतवलं मी

    माझा तर प्रेमावरचा
    विश्वासच असता उडाला
    कोमल नव्या प्रेमाचा गंध
    मला जर नसता लाभला

    प्रेमाच्या त्या आठवणीं
    आता जुन्या झाल्या आहेत
    अव्यक्त अश्या त्या वेदना
    आता मुक्या झाल्या आहेत

    थकलेले आयुष्य आता
    उतार आला असं सांगतयं
    जगलेल्या साऱ्या दिवसांचा
    हिशोब मला मागतयं

    भेटीच्या त्या जून्या जागा
    आता खूणवू लागल्या आहेत
    तुटलेले ते धागे आता
    मनाला विनवू लागले आहेत

    पूर्वीच्या त्या साऱ्या उणीवा
    आता मानवू लागल्या आहेत
    न पुसलेल्या त्या खूणा
    पुन्हा जाणवू लागल्या आहेत

    आठवणींच्या जुन्या जखमा
    आता सुक्या झाल्या आहेत
    अव्यक्त अश्या त्या वेदना
    आता मुक्या झाल्या आहेत

    - डॉ. सुभाष कटकदौंड

      August 22, 2018


  • नवरा माझा नवरा आहे

    खरं सांगते बरा आहे
    नवरा माझा नवरा आहे

    थोडासा तो कोडगा आहे
    जणु माझा पोरगा आहे

    कधी तो माझा पप्पा आहे
    मनातला नाजूक कप्पा आहे

    थोडासा तो चिडका आहे
    पण मायेचा झरा आहे

    खरं सांगते बरा आहे
    नवरा माझा नवरा आहे

    लहानांशी त्याची गट्टी आहे
    थोडासा तो हट्टी आहे

    त्याला वाटतं तो धाडसी आहे
    मला वाटतं तो आळशी आहे

    थोडासा तो हळवा आहे
    माझ्या जिवनाचा वारा आहे

    खरं सांगते बरा आहे
    नवरा माझा नवरा आहे

    थोडासा तो भावनिक आहे
    राग त्याचा क्षणिक आहे

    नव्या कल्पनेत उडणारा आहे
    जुन्या आठवणीत रमणारा आहे

    नव्या स्वप्नात रंगणारा आहे
    त्याच्यामुळे सौख्य घरा आहे

    खरं सांगते बरा आहे
    नवरा माझा नवरा आहे

    थोडासा तो ज्ञानी आहे
    सुखी आणि समाधानी आहे

    संयम थोडासा कमी आहे
    जिभेनं थोडा कडवा आहे

    पहिल्यापेक्षा बरा आहे
    मी कुठं म्हणते हिरा आहे

    खरं सांगते बरा आहे
    नवरा माझा नवरा आहे.

    - डॉ. सुभाष कटकदौंड

    On YouTube

      August 21, 2018


  • आठवणींच गाठोडं

    आठवणींच गाठोडं
    मनाच्या चोर कप्प्यात ठेवलेलं
    छोट्या अनुने हट्ट केला
    तेव्हा पहिल्यांदा बाहेर काढलेलं

    अनु नेहमी हट्टानं विचारत
    काय आहे पप्पा गाठोड्यात...?
    मग मीही सगळ्या आठवणी
    ओतायचो तिच्या पुढ्यात

    आठवणी मग घेवून जात
    तिला माझ्या भाव विश्वात
    तिला गाढ झोपवुनच
    परतायच्या त्या गाठोड्यात

    वेळ आहे तिची आता
    तिच्या विश्वात रमण्याची
    सवय झालीय मला
    गाठोडं उशाशी घेऊन झोपण्याची

    जेव्हा अनु नसते घरी
    गाठोड्याची गाठ सुटत नाही
    आठवणींची घूसमट तेव्हा
    माझ्याच्याने बघवत नाही

    काल अनु आली होती घरी
    अचानक तिला गाठोडं आठवलं
    काढल मी बाहेर पटकन
    अन् पुढ्यात तिच्या ठेवलं...

    विचारलं तिला, माझ्या माघारी
    गाठोड्याच काय होइल ग अनु ?
    डोळ्यात पाणी तरळलं तिच्या
    म्हणाली,
    पप्या, नको ना रे असं म्हणु

    डबडबलेले डोळे पुसले तिने
    अन् गाठोडं उराशी आवळलं...
    मला न विसरण्याच वचन ते
    शब्दांविनाही मला कळलं.

    - डॉ. सुभाष कटकदौंड

      August 17, 2018


  • प्रेमाचा चकवा

    वय होतं ते अल्लड
    आणि मन होतं कोवळं
    चंचल स्वभाव तिचा
    पण ह्रुदय होतं सोवळं

    अगदी उगाच सहज
    ती बघुन हसली होती
    त्याच्या खोट्या शपथेला
    पूरती फसली होती

    निरागस तिला
    निर्मळ प्रेमाची तहान होती
    त्याची प्रेमाची भाषा
    अगदीच वेगळी होती

    त्याचा तो स्पर्श
    हीन हिस्त्र वाटला तिला
    तिच्यातल्या स्त्रीनं
    तत्पर तो ओळखला

    नाजूक एकांतात तिनं
    स्वतःला सावरल होतं
    अवघड क्षणाला
    संयमानं जिंकल होतं

    संबंध त्याच्याशी
    कायमचे तिने तोडले
    वाईट स्वप्न समजून
    पानच ते फाडले

    स्पर्शाच्या जाणीवा
    धूतल्या तिने आसवांनं
    चुरगळलेल्या मनाला
    सावरलं अलगद धीरानं

    बोहल्यावर चढण्यापूर्वी
    सावध ती झाली
    सितेची अग्नीपरिक्षा तिला
    द्यावी नाही लागली

    सुंदर नविन जिवनात
    अगदी आनंदाने रमली
    अन् प्रेमाच्या चकव्याला
    पून्हा कधी नाही भूलली...

    - डॉ. सुभाष कटकदौंड

      August 15, 2018


  • शुभेच्छा बाळाला…

    जीवनात सदैव तू
    पुढे बघून चालशील
    अडखळलेल्या खड्ड्यांची
    जाणीव ठेवुन वागशील

    कर्तव्यापासून तू कधी
    दूर नको पळू
    तुटलेल्या त्या स्वप्नांसाठी
    आसु नको ढाळू

    सर्व काही मनासारखे होइल
    अशी अपेक्षा नको धरूस
    पण तुझ्या आवडी निवडींना
    कधी नकोस पुरूस

    संसार हि तारेवरची कसरत
    नंतर तुला कळेल
    इतकी ही तडजोड नको करूस
    कि मन तुझं जळेल

    माहित आहे मला तुला
    सारं कसं निटनेटक लागतं
    जास्त हट्ट नको करूस
    चुकून नातं ते फाटतं

    जीवन आहे ते बाळा
    कधी वादळ यायचं
    आयुष्य थोड विस्कटलं
    तर नाराज नाही व्हायचं

    शपथ आहे तुला बाळा
    माझं थोडं तू ऐकायचं
    विरहाची जाणीव नको
    अगदी आनंदाने तू जगायचं

    सर्वांची खूप काळजी करतेस
    स्वभाव आहे तुझा
    स्वतःसाठी पण जग बाळा
    आशिर्वाद आहे माझा.

    - डॉ. सुभाष कटकदौंड

      August 10, 2018


  • न ढळलेले अश्रू…

    शब्दांचे अर्थ शब्दांकडे
    हवे तसे वळलेच नाहीत
    तिचे ते हलके इशारे
    त्याला लवकर कळलेच नाहीत

    निरागस तिचा चेहेरा
    त्यानं जेव्हा पाहिला होता
    जुन्या शब्दांचा नवा अर्थ
    तेव्हा त्याला उमगला होता

    तरीही न जाणे का नंतर
    तो रेंगाळतच राहीला
    समाजातील अंतर जणू
    तो न्याहाळत राहीला

    तिला मात्र समाजाच्या दरीत
    डोकावयाचे नव्हते
    परीमाण ते वास्तवाचे
    तिला असे तोलायचे नव्हते

    तिला कसं मुक्त
    बेधुंद गायचं होतं
    स्वप्नांच्या झुल्यावर
    ऊंच ऊंच झुलायचं होतं

    सुंदर स्वप्नं तिचे ते
    मग स्वप्नचं राहीले
    कोमल विश्व तिचे
    ते हळूहळू मुरझले

    निरपेक्ष प्रेमाचे झरे
    आता आटले होते
    पंख गोड स्वप्नांचे
    अलगद तिनं छाटले होते

    अल्लड भावनांना
    तिनं मग आवरलं होतं
    मनात उठलेले तुफान
    एकटीनच सावरलं होतं

    त्याच्या मनात काय होते
    तिला अजून नाही कळले
    पण डबडबलेल्या डोळ्यातुन
    अश्रू कधीही नाही ढळले...

    - डॉ.सुभाष कटकदौंड

      August 6, 2018