कुणी भुंकली
कुणी थुंकली
कुणी म्हणालं, ‘जंगली’.
पण विधानसभा नाहीं भंगली.

अखेरीस एकानं केलं वॉक् आऊट,
अन्, दुसरी पार्टी ट्रस्ट-व्होट जिंकली

- सुभाष स. नाईक

पुण्यामधलंच स्थळ हवं ।
मुंबईला सेकंड ऑप्शन ।
लिकर पी कर विकएन्ड ।
लाईफसाठी हीच कॅप्शन ।।

शनवारवाडा , वैशाली हे ।
आऊटडेटेड झाले पॉईंट्स ।
गोल ऍचिव्ह करण्यासाठी ।
शोधते मी नव्या हाईट्स ।।

मल्टिप्लेक्स , मॉल मध्ये ।
टाईमपास भारी होतो ।
सिंहगड पर्वतीवर ।
आता कोण जातो येतो ?

फेबु ट्विटर मेसेंजरवर ।
अपडेट्सचा धूर अन् जाळ ।
मेमरी होते फुल तरीही ।
नेटवरचा येतोच गाळ ।।

जेवण घरचं बेचव सालं ।
हवा यार पिझ्झा बर्गर ।
पब क्लब डान्सफ्लोअर ।
सच तो है ये हुक्का पार्लर ।।

बाईकवरची नशाच न्यारी ।
गच्च धरावं बॉयफ्रेंडला ।
तोंडावरती स्कार्फ बांधून ।
थेट घुसावं लॉंग ड्राइव्हला ।।

चॅटिंग डेटिंग करण्यासाठी ।
फार्म हाऊस पॅकेजवाली ।
ब्रेकअप , पॅचअप इव्हेंट्ससाठी ।
तिथेच होते पार्टी ओली ।।

ऑनलाइन मिटिंगमधल्या ।
पोझिशन्स अँड कमिटमेंट्स ।
एमबीए चं येडं पकवतं ।
रिझल्ट्स, मॉरल , एटिकेट्स ।।

स्थळाला दे होकार बये ।
आई रडते रोज घरी ।
' वय वाढतं ' बोअर करते ।
पॅनिक होते घरीदारी ।।

नकोच मुलं , नकोच नाती ।
डस्टबीन्स तर नकोच घरी ।
ऑकेजनली ड्रग्ज साठी ।
लिव्ह इन चा ऑप्शन भारी ।।

चौकट नको , स्पेस हवी ।
त्यासाठीच तर धावाधाव ।
माझं पॅकेज , माझं शहर ।
मीच ठरविन , माझी हाव ।।

* * * *

पस्तिसाव्या वाढदिवशी ।
कुणी नाही विश केलं ।
अजून तिला कळलं नाही ।
क्षितीज किती दूर गेलं ।।

अजून तिला वाटत राहतं ।
पुण्यामधलंच स्थळ हवं ।
आरसा हसतो हळूच गाली ।
तिला नसतं भान नवं ।।

- डॉ. श्रीकृष्ण जोशी, रत्नागिरी

वाहतो पवन बेभान धुंदला
उधळीत गंध शब्दभावनांचे

गडगडता अंबरी कृष्णमेघनां
प्रीतगान, मृदगंघले वसुंधरेचे

ओढ अधीर, अवीट मधुरम
संथ झुळझुळणे ते निर्झराचे

मन ओले, ओले चिंब चिंबले
साक्षात्कार प्रसन्न वर्षाऋतुचे

स्वर, पावरीचे श्रावण श्रावण
सप्तरंगलेले, इंद्रधनु अंतरीचे

हे स्वानंदाचे सात्विक सोहळे
संगीत जणु, कृतार्थ जीवनाचे

-- वि.ग.सातपुते (भावकवी)

9766544908

रचना क्र. २२६

५/९/२०२२

रंगले माझे मन मुरारी
नाम येई मुखीं श्रीहरी //धृ//

काळा सावळा रंग
कोमल भासे अंग
हास्य खेळते वदनीं
तेज चमके नयनीं
ओढ लागतां शरिरीं //१//

रंगले माझे मन मुरारी, नाम येई मुखीं श्रीहरी
कंठी माळा चमकती
मोर पिसे टोपावरती
पायीं नुपुरे घालूनी
नाचतो ताल धरुनी
हातांत त्याच्या बासरी //२//

रंगले माझे मन मुरारी, नाम येई मुखीं श्रीहरी
मुरली वाजे मधूर
नृत्य ते बहरदार
खेळातील तुझ्या लीला
छबी राही मनावरी //३//

रंगले माझे मन मुरारी, नाम येई मुखीं श्रीहरी

डॉ. भगवान नागापूरकर
९००४०७९८५०
bknagapurkar@gmail.com

दवबिंदुंचा थेंब पाहे,प्रतिबिंब फुलाचे पाण्यात,
पाणी का आरसा आहे,
प्रश्न पडे त्यास मनात,--!!!

रंग पाहून पाण्याचे,
थेंबही भासे कसा रंगीत,
विविधढंगी रूप असे,
पाहून त्याचा जीव चकित,--!!!

फूल कसे निडर असे,
रंग त्याचे ना बदलत,
पाणीच आपुले रंग बदले,
प्रतिमा त्याची हृदयी ठसवत,--!!!

आखीव-रेखीव पाकळ्यांचे,
बाल- स्वरूप दिसे पाण्यात,
थेंबात परागकण मोठाले,
सारे थेंबाच्या आत डोकावत,--!!!

सगळेच फूल त्यात सामावे, थेंबाला जग लहान भासत,
पाणी खाली उगीच खळाळे दोघांनाही करे परावर्तित,--!!!

थेंबाथेंबाचे जगच निराळे,
भोवतालला कवेत घेत,
जो डोकावे त्यास दिसे,
आपले रुपडे पहा पाण्यात,--!!
आपण खरे आहोत कसे,
छबी तरंगे पाण्यात, हलत,--!!

फुला- थेंबा- पाण्याचे,
विश्व का निराळे असत,--?
आपणास कोण व्हायचे,
चला ठरवू आपण कल्पत,--!!!

©️ हिमगौरी कर्वे.

तुम्ही गेला आणि गेले सुकूनी माझे काव्य
समजूनी आले रूप तुमचे होते जे दिव्य

तुमच्या अस्तित्वाने मजला येत असे स्फूर्ती
प्रफूल्लीत ते भाव सारे ओठावर वाहती

कोकीळ गाते गाणे जेंव्हां वसंत फुलतो वनी
मोर नाचे तालावरती श्रावण मेघ बघूनी

हासत डोलत कळी उमलते प्रात: समयी
दवबिंदूच्या वर्षावाची किमया सारी ही

गात नाचत फुलत राहतो चैतन्याने कुणी
स्फूर्ती देवता हवी तयाला येण्या उचंबळूनी

-- डॉ. भगवान नागापूरकर
९००४०७९८५०
bknagapurkar@gmail.com

“जीवनात यशस्वी होण्यासाठी वास्तव स्वीकारायला शिकले पाहिजे “, असे धडे गिरवणाऱ्यांपेक्षा, परिस्थितीमुळे थिजलेल्या अश्रू,भावना, इच्छा, आकांक्षा, प्रेम अशा जाणीवांच्या वीटा पायाखाली रचून, त्यावर उभं राहून जग पाहणाऱ्यांना जीवनाचं वास्तव जास्त स्पष्ट दिसत असावं.

कळप

सतत फिरे चक्र निसर्गाचे

सुख दु:खाचे...१,

एका मागूनी दुसरा असती

पाठोपाठ येती...२,

प्रत्येक वस्तूची छाया असते

पाठलाग करिते....३,

सुखाचे जाता काही क्षण आनंदी

समाधानाची होई गर्दी....४

लगेच अनूभव येतो दु:खाचा

काळ जाई निराशेचा...५,

पूनरपी येता सारे सुख

विसरूनी जातो दु:ख....६,

जे होत असते ते बऱ्यासाठी

म्हणती समाधाना पोटी...७,

समाधान शोधणे हेही सुख

त्यातच जगती अनेक...८

डॉ. भगवान नागापूरकर

९००४०७९८५०

मनांत ठसले रूप तुझे, येते नयना पुढे ।

रात्रंदिन मज चैन ना पडे.....।।धृ।।

शरीर जरी सुंदर मिळे ।

प्रयत्नांनी तूंच कमविले ।।

चपलता ही छाप पाडीते ।

लक्ष्य खेचूनी तुझ्याकडे

मनी ठसविले रूप तुझे येत नयना पुढे ।१।

हासणे खेळणें आणि चालणें ।

'ढंगदार' तुझे बोलणे ।।

शरीरामधल्या हालचालींना ।

सहजपणाचे वळण पडे

मनी ठसविले रूप तुझे येत नयना पुढे....।२।

स्वभाव आहे जरी मृदू तो ।

प्रसंग पडतां कठीण भासतो ।।

सज्जना पुढती नम्र दिसूनी ।

दुर्जना शिरीं वज्र पडे

मनी ठसविले रूप तुझे येत नयना पुढे ....।३।

हृदयीं माझ्या घर करूनी ।

तव प्रतिमा दिली ठेवूनी ।।

ईश्वर तूंच खरा तो ।

पूजन सदैव करीते

मनी ठसविले रूप तुझे येत नयना पुढे ....।४।

डॉ. भगवान नागापूरकर

९००४०७९८५०

--स्वाती ठोंबरे.