सांगते जरा ऐका, नका दाखवू हे रूप,
माणूसच खातो चाखून माखून, मेल्या मड्यावरचं तूप !!
हाड् म्हटलं की, कुत्रा तरी निघून जातो,
माणूस मात्र कुत्रं बनून, शेपूट हलवित राहतो!!१!!

सांगते जरा ऐका, नका......!!
तुझं तू माझं मी, असं फक्तं मुखाने बोलतो,
डोळ्यांआड दुसऱ्या ताटात जिभाळ गाळीत डोकावतो!!२!!

सांगते जरा ऐका, नका......!!
परके आले पुढ्यात, तत्त्व प्रदर्शन मांडतो,
वेळ आली स्वत:ची की झटकन धुळ झाडतो!!३!!

सांगते जरा ऐका, नका......!!
म्हणतो खाते मांजर, डोळे मिटून लोणी,
मी मज्जा मारताना, पाहू नये हो कोणी!!४!!

सांगते जरा ऐका, नका......!!
चटक मटक लोणचं हवं, रोजच्या ताटाला नवं,
भुलवून म्हणे "तुझ्या-माझ्या संसाराला अजून काय हवं?"!!५!!

सांगते जरा ऐका, नका......!!
हौस मज्जा मस्ती दररोज हवी बासणीला,
मेहनतीच्या वेळी राहती, चटपटीत कारणं याच्या वस्तीला!!६!!

सांगते जरा ऐका, नका......!!
आवर नाही स्वत:स, तोच म्हणतो हो सावर,
तुझ्या आधी भरून घेतो, माझी सोन्याची घागर !!७!!

सांगते जरा ऐका, नका दाखवू हे रूप,
माणूसच खातो चाखून माखून, मेल्या मड्यावरचं तुप!!

-- श्वेता संकपाळ

विष्ठा बघूनी थुंकलो, घाण वाटली मजला
अमंगल संबोधूनी, लाखोली देई तिजला....१,

संतापूनी मजवर , कान उघडणी केली
तुझ्याचमुळें मुर्खा मी, अमंगळ ती ठरली, २

आकर्षक रूप माझे, लाडू करंज्यानें युक्त
कपाटातूनी काढूनी, केले सारे तूंच फस्त ३

परि मिळतां तुझा तो, अमंगळ सहवास
रूप माझे पालटूनी, मिळे हा नरकवास ४

डॉ. भगवान नागापूरकर
९००४०७९८५०

दुष्काळानंतरचा पाऊसगारवा देणारा असतो,
प्रेयसीने प्रियकराच्याजखमेवर प्रेमाने फुंकर घालावी तसा...
तापलेली जमिन पावसानेथंड झाल्यावर आनंदाने हिरवा शालू नेसते,
साखरपुड्यात नववधू नेसतेतसा...
सृष्टीचे हे बदलेले रूपशेतकरी डोळेभरून पाहातो,
प्रियकर आपल्याप्रेयसीचे अप्रतीम सौंदर्य चोरून पाहातो तसा...
शेतकर्‍याच्यास्वप्नांना पावसात नवीन पालवी फुटून तो आनंदी होतो,
प्रेयसीशीच लग्नठरल्यावर प्रियकर होतो तसा...

©निलेश बामणे

तुझ्यासाठी ग फक्त तुझ्यासाठी
माझ्या मेंदूला कंप सुटतात
हृदयात वेदना रोज होतात...
तुझ्यासाठी ग फक्त तुझ्यासाठी
माझे डोळे अश्रूंनी ओलावतात
माझी स्वप्ने सारी भंगतात...
तुझ्यासाठी ग फक्त तुझ्यासाठी
माझे दिवस वाया जातात
माझे विचार स्वैर होतात...
तुझ्यासाठी ग फक्त तुझ्यासाठी
माझ्या क्षणांचे तास होतात
माझ्या जगण्याचे बारा वाजतात

कवी - निलेश बामणे ( एन. डी.)

तू एक बहीण
आम्ही तिघे भाऊ
वाटे टाकू चार
मिळून खाऊ, खाऊ

बाजारच्या खाऊची
मजा असते भारी
पुडा सोडताच
तोंडा सुटते खारी

गोडीशेव, जिलेबी
शिळे नको ताजे
आई म्हणते कशी
नका खाऊ भजे

रंग फळांचा दिसे
गंज आबलुकवाणी
दाताने कुरतडावे
जिभेस सुटते पाणी

उघडा खाऊ खाऊन
दुखेल बरकां पोट
पालेभाज्या खाऊन
सुधारते ती तब्येत

सकस खा, खूप खेळा
परिपाठास शाळेत पळा

-- विठ्ठल जाधव
शिरूरकासार, जि.बीड
सं. ९४२१४४२९९५

मन विवस्त्र आहे
मेंदूचा बंधना शिवाय!

संस्कार रूपी बंधनाने
खरच का मन नियंत्रणात राहिल का
मोहाला आवरता येईल का
चांगल्या संस्कारात गुंतवून

मायेन वासनेला थोपवता येईल का
स्वैराचार रोखता येईल का
शिस्तीत जीवन जगून!

अशा गुंतागूती सरळ उत्तर मिळणार नाहीत
पण जरा चांगल्या संस्काचा आवरणात वावर
शिस्तीत रहायचा प्रयत्न कर
तुझा तुलाच प्रत्यय येईल.

नियंत्रणात उच्च कोटीच्या स्वैर विचारांचे सुख मिळविता येते.

श्रीकांत बर्वे

जादूगार तूं देवा, दाखवी चमत्कार
आठवण येण्या तुझी, करितो हाः हाः कार ।।धृ।।

ढग काळे काळे
जमवितोस सगळे
गर्जती वादळे
कडाडूनी विजा, पर्जन्य होई भयंकर ।।१।।

जादूगार तूं देवा, दाखवी चमत्कार
आठवण येण्या तुझी, करितो हाः हाः कार

तळपते ऊन
दग्ध होई जीवन
जाई वाळून
तेज वाढूनी सूर्याचे, दाह करी फार ।।२।।

जादूगार तूं देवा, दाखवी चमत्कार
आठवण येण्या तुझी, करितो हाः हाः कार

कड्याक्याची थंडी
भरुनी हुडहुडी
देहाला सिकूडी
गाठूनी जाती, ज्याना नसे घर ।।३।।

जादूगार तूं देवा, दाखवी चमत्कार
आठवण येण्या तुझी, करितो हाः हाः कार

सुख तुंची देतो
दुःख तूंची देतो
लक्ष्य तूं वेधतो
चमत्काराविणा कसे, आस्तित्व भासणार ।।४।।

जादूगार तूं देवा, दाखवी चमत्कार
आठवण येण्या तुझी, करितो हाः हाः कार

-- डॉ. भगवान नागापूरकर
९००४०७९८५०
bknagapurkar@gmail.com

कारल्याची बी पेर ग सुनबाई मग जा अपूल्या माहेरा माहेरा

कारल्याची बी पेरली हो सासूबाई आता तरी धाडा ना धाडा ना

कारल्याला कोंब येऊ दे ग सुनबाई मग जा अपूल्या माहेरा माहेरा

कारल्याला कोंब आल हो सासूबाई आता तरी धाडा ना धाडा ना

कारल्याला वेल येऊ दे ग सुनबाई मग जा अपूल्या माहेरा माहेरा

कारल्याला वेल आला हो सासूबाई आता तरी धाडा ना धाडा ना

कारल्याला फुल येऊ दे ग सुनबाई मग जा अपूल्या माहेरा माहेरा

कारल्याला फुल आले हो सासूबाई आता तरी धाडा ना धाडा ना

कारल्याला कारले लागू दे ग सुनबाई मग जा अपूल्या माहेरा माहेरा

कारल्याला कारले लागले हो सासूबाई आता तरी धाडा ना धाडा ना

कारल्याची भाजी कर ग सुनबाई मग जा अपूल्या माहेरा माहेरा

कारल्याची भाजी केली हो सासूबाई आता तरी धाडा ना धाडा ना

कारल्याची भाजी खा ग सुनबाई मग जा अपूल्या माहेरा माहेरा

कारल्याची भाजी खाल्ली हो सासूबाई आता तरी धाडा ना धाडा ना

कारल्याचा गंज घास ग सुनबाई मग जा अपूल्या माहेरा माहेरा

कारल्याचा गंज घासला हो सासूबाई आता तरी धाडा ना धाडा ना

मला काय पुसते बरीच दिसते पूस आपल्या सासऱ्याला सासऱ्याला

मामंजी मामंजी मला मूड आल पाठवता की नाही नाही

मला काय पुसते बरीच दिसते पूस आपल्या भासऱ्याला भासऱ्याला

दादाजी दादाजी मला मूड आल पाठवता की नाही नाही

मला काय पुसते बरीच दिसते पूस आपल्या जावेला जावेला

जाऊबाई जाऊबाई मला मूड आल पाठवता की नाही नाही

मला काय पुसते बरीच दिसते पूस आपल्या नन्देला नन्देला

वन्स वन्स मला मूड आल पाठवता की नाही नाही

मला काय पुसते बरीच दिसते पूस आपल्या दीराला दीराला

भाऊजी भाऊजी मला मूड आल पाठवता की नाही नाही

मला काय पुसते बरीच दिसते पूस आपल्या नवऱ्याला नवऱ्याला

पतीराज पतीराज मला मूड आल पाठवता की नाही नाही

आन फणी घाल वेणी मग जा अपूल्या माहेरा माहेरा

आणली फणी घातली वेणी भुलाबाई गेल्या माहेरा