बल्लवाचार्यसाहित्य:- लोणच्याची कैरी 3 किलो, काळी मोहरी 250 ग्राम, जिरे 50 ग्राम, मिरी , लवंग प्रत्येकी 10,15 मेथी , शाजिरं प्रत्येेकी साखरेचा 1 चमचा, लसूण सोलेल्या पाखळ्या मूठभर, शेंगदाणे तेल एक बॅग, मीठ.
कृती:- कैरी घेतानाच कापून घ्यावी आणि घरी त्याच्या अजून लहान फोडी कराव्या. स्वच्छ करून म्हणजे त्यातील कोय, पातळ पापुद्रा काढून टाकून स्वच्छ पाण्यात धुवून घेऊन त्यात मूठभर मीठ , एक चमचा हळद घालून मिक्स करावे. एका बरणीत हे सगळे भरून बरणी एका कोपऱ्यात ठेऊन द्यावी रात्रभर. काही कारणाने लगेच लोणच्याचा मसाला नाही करता आला तरी हे मिश्रण असेच मुरत राहते सो फिकर नोट.लोणचं करताना बनवून ठेवलेले कैरीचे मिश्रण चाळणीत काढून सुटलेलं पाणी निचरून टाकावे. मोहरी ,जिर, अर्ध्या लवंगा न मिरी भाजून मिक्सर मधून बारीक करून घ्यावे. तेल उकळून घ्यावे त्यात लसूण पाकळ्या तळून त्यातच अक्खी मोहरी, मिरे , लवंगा, शाजिरे,मेथी एकत्र तळून गॅस बंद करावा आणि हे मिश्रण थंड करायला ठेवावे. एका मोठ्या परातीमध्ये मिक्सरमधून काढलेल बारीक मिश्रण ,100 ग्राम लाल तिखट ( मी 150 ग्राम घेतले जास्त तिखटासाठी) 4 मोठे चमचे मीठ एकत्र करून त्यात सर्व तळलेल्या मिश्रण सकट तेल घालून नीट एकत्र करावे. मीठ , तेल थोडे जास्तच घालावे ज्याने लोणचे टिकते. हे मिश्रण चांगले थंड झाले की बरणीत भरून झाकण लावून त्यावर स्वच्छ सफेद कापड बांधावे(बहुतेक हवा जाऊ नये म्हणून असेल).रोजच्या रोज लोणच्याला बरणीतच खालीवर करून परत मिश्रण एकत्र करावे.
वि.सु.:- लोणचे पूर्णपणे बुडेल एवढे तेल वरती असायला हवे.
