नाचणी हे एक दुर्लक्षित धान्य आहे. आपल्याकडे नाहीतरी रंगाला अतिमहत्त्त्व देण्याची पद्धत आहेच. नाचणी मुळात मरून लाल रंगाची असते. आणि तिचं पीठ जरासं काळपट रंगाचं होतं. नाचणीची भाकरीही काहीशी लालसर काळपट रंगाची होते. त्यामुळे कदाचित नाचणी आपल्याकडे म्हणावी तितकी खाल्ली जात नाही. अपवाद दक्षिणेकडच्या राज्यांचा. कर्नाटकात नाचणीचं सर्वाधिक उत्पादन होतं. कर्नाटकात आणि आंध्र प्रदेशात नाचणी भरपूर प्रमाणात खाल्ली जाते.