काल दिवसभर भुरभुर पाऊस पडत होता …. वातावरण जुलैमध्ये असतं अगदी तसंच होतं …. आम्ही आमच्या एका स्नेह्याच्या शेतावर गेलो होतो …. कर्जत जवळ … आजूबाजूला गच्च रान …. शांतता आणि अर्थात सगळीकडे पिवळी ….गुलाबी … जांभळी चिमुकली रानफुलं चांदण्यांसारखी सुंदर फुललेली … या भुरभुरत्या पावसात मस्त डोलणारी …. चिमुकली म्हणजे किती …. तर आपल्या हाताच्या करंगळीच्या नखाएवढी चिमुकली … त्यांना बघून मी बऱ्याच दिवसांनी मॅक्रो लेन्स बाहेर काढली …. खरं तर भुरभुरता का होईना पाऊस सतत होताच … आणि पावसात फोटो काढणं … ते ही मॅक्रो लेन्सने म्हणजे कठीणच काम होतं … पावसाचा एक थेंब सुद्धा कॅमेऱ्यासाठी धोकादायक …. पण कॅमेऱ्यावर नॅपकिन ठेवला … कोणीतरी वर छत्री धरली आणि माझी ही लेन्स या फुलांशी थोडी बोलली …. पावसामुळे फार आणि नीट बोलणं झालं नाही …. पण अर्थात खूप आनंद मात्र मिळाला …..