साहित्य: अर्धा किलो चिकन, ४-५ कप चिकन स्टॉक, ५-६ बांबूशुटसचे तुकडे, ४-५ बटण मशरूम्स, १ लहान गाजर, अर्धा कप चिरलेला कोबी, अर्धा टी स्पून अजिनोमोटो, पाव टी स्पून काळेमिरे पावडर, १ टी स्पून मीठ, पाव टी स्पून किसलेले आले, पाव कप कांद्याची पात.

कृती: वेळ: ४० मिनिटे प्रथम बांबूशूटस उभे पातळ चिरावे व पुन्हा मध्ये थोडे चिरून थोडा वेळ पाण्यात भिजवावे. गाजर तिरके चिरून पुन्हा छोटे चौकोनी तुकडे करावेत. मशरूम्सचे मध्ये दोन भाग करावेत व चौकोनी बारीक तुकडे करावेत. कोबीचे बारीक चौकोनी तुकडे करावेत. चिकन बोनलेस करून चौकोनी पातळ तुकडे करावेत. पातेल्यात स्टॉक उकळत ठेवावा. प्रथम त्यात चिकनचे तुकडे घालावेत. नंतर सर्व भाज्या एकामागून एक घालत स्टॉक उकळत ठेवावा. २-३ मिनिटे चांगली उकळी आली की मीठ, मिरेपावडर, किसलेले आले इत्यादी घालावे. शेवटी चिरलेली कांद्याची पात घालावी. सूप चांगले उकळवावे व गरमागरम सर्व्ह करावे.